సంగీత దర్శకుడు చరణ్ అర్జున్‌కు ఘన సన్మానం
* ‘గరివిడి లక్ష్మి’ సినిమా విజయోత్సవం సందర్భంగా అభినందనలు
NTODAY NEWS ; చిట్యాల
‘గరివిడి లక్ష్మి’ సినిమా విజయవంతమైన సందర్భంగా ప్రముఖ సినీ సంగీత దర్శకుడు, రచయిత, గాయకుడు, పూలే జాతీయ సేవా పురస్కార గ్రహీత చరణ్ అర్జున్ (చిన్ని చరణ్)ను తెలంగాణ రాష్ట్ర మలిదశ ఉద్యమకారుల సంక్షేమ సంఘం వ్యవస్థాపక అధ్యక్షుడు కూనూరు సంజయ్ దాస్ గౌడ్ ఘనంగా సన్మానించారు. చరణ్ అర్జున్ స్టూడియోలో కేక్ కట్ చేసి, శాలువా కప్పి, జ్ఞాపిక అందజేసి అభినందించారు. ఈ సందర్భంగా సంజయ్ దాస్ గౌడ్ మాట్లాడుతూ నల్లగొండ జిల్లా మేళ్లదుప్పలపల్లి గ్రామానికి చెందిన చరణ్ అర్జున్ తెలుగు సినీ సంగీత రంగంలో తనదైన గుర్తింపు సంపాదించుకున్నారని పేర్కొన్నారు. ‘ఆయుధం’ చిత్రంలోని పాటతో సినీ రంగ ప్రవేశం చేసిన ఆయన, ‘స్టైల్’, ‘డాన్’, ‘విమానం’, ‘లగ్గం’, ‘గరివిడి లక్ష్మి’ తదితర చిత్రాలకు సంగీతం అందించారని తెలిపారు. తెలంగాణ జానపద సంగీతానికి మరింత గుర్తింపు తీసుకురావాలని ఆకాంక్షించారు. ఈ కార్యక్రమంలో ‘కేసీఆర్ ఏ తల్లి పిల్లోడు’ పాటతో గుర్తింపు పొందిన గాయని వొల్లల వాణి, నేస్తం స్వచ్ఛంద సేవా సంస్థ వ్యవస్థాపకుడు, వండర్ బుక్ ఆఫ్ రికార్డ్స్ గ్రహీత డా. టి.జి. లింగం గౌడ్ తదితరులు పాల్గొని చరణ్ అర్జున్‌ను అభినందించారు.
