తూర్పు గోదావరి జిల్లాలో పాఠశాలలకు రేపు సెలవు

తూర్పు గోదావరి, సెప్టెంబర్ 23: తుఫాను ప్రభావం, ఎడతెరిపి లేకుండా కురుస్తున్న వర్షాల నేపథ్యంలో విద్యార్థుల సంక్షేమం, భద్రతను దృష్టిలో ఉంచుకుని సెప్టెంబర్ 24, గురువారం తూర్పు గోదావరి జిల్లాలోని అన్ని యాజమాన్యాల పరిధిలో ఉన్న పాఠశాలలకు పరిహార సెలవు (Compensatory Holiday) ప్రకటించారు.

ఈ మేరకు జిల్లా విద్యాశాఖ అధికారి (DEO) ఒక ప్రకటన విడుదల చేశారు. జిల్లాలోని అన్ని మండల విద్యాశాఖ అధికారులు (MEOలు), పాఠశాలల ప్రధానోపాధ్యాయులు (HMలు) ఈ సమాచారాన్ని తమ పరిధిలోని పాఠశాలలకు వెంటనే తెలియజేయాలని ఆదేశించారు.

ఎట్టి పరిస్థితుల్లోనూ గురువారం విద్యార్థులను పాఠశాలలకు రప్పించకుండా తగిన చర్యలు తీసుకోవాలని సూచించారు. ప్రస్తుత వాతావరణ పరిస్థితుల్లో విద్యార్థుల భద్రతకు అత్యధిక ప్రాధాన్యత ఇవ్వాలని DEO స్పష్టం చేశారు.