తుపాను వేళ తక్షణ స్పందన.. రహదారిపై కూలిన చెట్టును తొలగించిన పోలీసులు

ప్రజలకు రాకపోకల్లో ఇబ్బందులు కలగకుండా చర్యలు చేపట్టిన ఎస్ఐ జయబాబు, సిబ్బంది 

మురసు తుపాను ప్రభావంతో ఏలూరు జిల్లా టి.నరసాపురం మండలంలో వీచిన ఈదురుగాలులకు ఏపుగుంట గ్రామ సమీపంలో భారీ చెట్టు రహదారిపై కూలిపోయింది. దీంతో వాహనాల రాకపోకలకు తీవ్ర అంతరాయం ఏర్పడింది. విషయం తెలుసుకున్న టి.నరసాపురం ఎస్ఐ జయబాబు వెంటనే స్పందించి పోలీసు సిబ్బందితో కలిసి ఘటనాస్థలానికి చేరుకున్నారు. జేసీబీ, చెట్లను కత్తిరించే యంత్రాల సహాయంతో రహదారిపై కూలిన చెట్టును తొలగించే చర్యలు చేపట్టారు. చెట్టు కొమ్మలు, ఇతర అడ్డంకులను తొలగించి వాహనాల రాకపోకలకు మార్గం సుగమం చేశారు. తుపాను ప్రభావంతో ప్రజలకు ఎలాంటి ఇబ్బందులు కలగకుండా, అత్యవసర సమయాల్లో రవాణాకు ఆటంకాలు ఏర్పడకుండా పోలీసులు తక్షణ చర్యలు చేపట్టారు. ప్రతికూల వాతావరణ పరిస్థితుల్లోనూ ప్రజల భద్రతకు ప్రాధాన్యతనిస్తూ ఎస్ఐ జయబాబు, పోలీసు సిబ్బంది స్పందించిన తీరుపై స్థానికులు అభినందనలు వ్యక్తం చేశారు. ఈ సందర్భంగా పోలీసులు ప్రజలకు పలు సూచనలు చేశారు. ఈదురుగాలులు వీచే సమయంలో చెట్ల కింద, విద్యుత్ స్తంభాల సమీపంలో, ప్రమాదకర ప్రాంతాల్లో ఉండకూడదని, అత్యవసరమైతే తప్ప బయటకు రావద్దని సూచించారు. విపత్కర పరిస్థితుల్లో ప్రజల భద్రతే ప్రధాన లక్ష్యంగా ఏలూరు జిల్లా పోలీసు శాఖ నిరంతరం అందుబాటులో ఉంటూ సహాయక చర్యలు చేపడుతుందని ఎస్ఐ జయబాబు తెలిపారు.