MMAలో భారత్‌కు తొలి పతకం.. చరిత్ర సృష్టించిన సుచికా తరియాల్

ఆసియా క్రీడల్లో మిక్స్డ్ మార్షల్ ఆర్ట్స్‌ (MMA) 60 కేజీల విభాగంలో భారత క్రీడాకారిణి సుచికా తరియాల్ కాంస్య పతకం సాధించి చరిత్ర సృష్టించారు. ఆసియా క్రీడల MMA విభాగంలో భారత్‌కు తొలి పతకాన్ని అందించిన క్రీడాకారిణిగా ఆమె నిలిచారు.

సెమీఫైనల్ పోరులో సుచికా తరియాల్, ఆమె ప్రత్యర్థి మధ్య పోరు డ్రాగా ముగిసింది. అయితే నిబంధనల ప్రకారం ప్రత్యర్థి కంటే సుచికా 700 గ్రాముల బరువు ఎక్కువగా ఉండటంతో ఆమెను ఫైనల్‌కు అర్హురాలిగా ప్రకటించలేదు. దీంతో కాంస్య పతకంతోనే పోటీ నుంచి వైదొలగాల్సి వచ్చింది.

చిన్ననాటి చేదు అనుభవాల నేపథ్యంలో మార్షల్ ఆర్ట్స్‌ వైపు అడుగుపెట్టిన సుచికా.. ఎన్నో ఆర్థిక ఇబ్బందులను అధిగమిస్తూ కఠోర శ్రమతో ఈ స్థాయికి చేరుకున్నారు. ప్రతికూల పరిస్థితులను ఎదుర్కొంటూనే అంతర్జాతీయ వేదికపై సత్తా చాటి దేశానికి చారిత్రాత్మక పతకాన్ని అందించారు. ఆమె విజయంతో భారత MMA క్రీడాకారుల్లో కొత్త ఆశలు చిగురించాయి.