జూబ్లీహిల్స్ సీఐ సస్పెన్షన్.. మహిళ ఫిర్యాదులో సంచలన పరిణామం
హైదరాబాద్లోని జూబ్లీహిల్స్ పోలీస్స్టేషన్కు చెందిన సీఐ శ్రీనివాసులు రెడ్డిని సస్పెండ్ చేస్తూ నగర పోలీస్ కమిషనర్ ఉత్తర్వులు జారీ చేశారు. ఓ మహిళ ఇచ్చిన ఫిర్యాదుపై నిర్వహించిన విచారణలో ఆరోపణలకు బలం చేకూరినట్లు అధికారులు గుర్తించిన నేపథ్యంలో ఈ చర్యలు తీసుకున్నట్లు సమాచారం.
విచారణలో, ఫిర్యాదు చేసేందుకు వచ్చిన మహిళతో సీఐ వ్యక్తిగత సంబంధం కొనసాగించినట్లు, ఆమెను శారీరకంగా దుర్వినియోగం చేసినట్లు తేలినట్లు తెలుస్తోంది. అలాగే మహిళకు సంబంధించిన వీడియోలను అడ్డం పెట్టుకుని డబ్బులు వసూలు చేసినట్లు కూడా పోలీసుల దర్యాప్తులో వెలుగులోకి వచ్చినట్లు సమాచారం.
ఈ వ్యవహారంలో సీఐ, బాధిత మహిళ కొంతకాలం ఒకే ఇంట్లో కలిసి ఉన్నట్లు అధికారులు గుర్తించినట్లు తెలిసింది. అనంతరం ఆమెను దూరం చేసుకునేందుకు పలుమార్లు ప్రయత్నించినట్లు కూడా విచారణలో బయటపడినట్లు సమాచారం.
ఈ ఆరోపణలను అత్యంత తీవ్రంగా పరిగణించిన ఉన్నతాధికారులు, శాఖ ప్రతిష్ఠకు భంగం కలిగించే విధంగా వ్యవహరించినందుకు శ్రీనివాసులు రెడ్డిని విధుల నుంచి సస్పెండ్ చేస్తూ ఉత్తర్వులు జారీ చేశారు. ఘటనపై శాఖాపరమైన చర్యలతో పాటు తదుపరి దర్యాప్తు కొనసాగుతోంది.
