కూసుమంచిలో మొహరం సందడి.. ఊరేగుతున్న పీరీలు.. చిన్ననాటి జ్ఞాపకాలకు మళ్లీ ఊపిరి!

ఖమ్మం జిల్లా కూసుమంచిలో మొహరం వేడుకలు భక్తిశ్రద్ధలతో కొనసాగుతున్నాయి. మొహరం సందర్భంగా భారీ పీరీల ఊరేగింపులు ప్రత్యేక ఆకర్షణగా నిలుస్తున్నాయి. కూసుమంచిలో ప్రతి ఏటా పెద్ద పెద్ద పీరీలు అధిక సంఖ్యలో ఊరేగడం ఈ వేడుకల ప్రత్యేకత.

సాయంత్రం 4 గంటల నుంచి పాత మసీద్ సెంటర్‌లో జాతర ప్రారంభమై భక్తులు, ప్రజలతో సందడిగా మారుతుంది. వివిధ ప్రాంతాల నుంచి తరలివచ్చిన ప్రజలు పీరీలను దర్శించుకుని మొక్కులు చెల్లించుకుంటున్నారు.

కూసుమంచి వాసులకు ఈ మొహరం వేడుకలు చిన్ననాటి జ్ఞాపకాలను గుర్తు చేస్తూ, మధురస్మృతులను మరోసారి సజీవం చేస్తున్నాయి. మతసామరస్యానికి ప్రతీకగా జరిగే ఈ వేడుకల్లో అన్ని వర్గాల ప్రజలు పాల్గొని ఆనందోత్సాహాలతో వేడుకలను జరుపుకుంటున్నారు.