గంగమ్మ ఒడికి ఖైరతాబాద్ మహాగణపతి.. ప్రశాంతంగా ముగిసిన నిమజ్జనం
హైదరాబాద్లో ప్రతిష్ఠాత్మకంగా నిర్వహించిన ఖైరతాబాద్ మహాగణపతి నిమజ్జనం శుక్రవారం ప్రశాంతంగా ముగిసింది. ఈ ఏడాది 69 అడుగుల ఎత్తుతో పంచముఖ సంకటహర మహాగణపతిగా భక్తులకు దర్శనమిచ్చిన విగ్రహాన్ని వేలాది మంది భక్తుల జయజయధ్వానాల మధ్య హుస్సేన్సాగర్లో నిమజ్జనం చేశారు.
ఉదయం 9.30 గంటలకు ఖైరతాబాద్ నుంచి ప్రారంభమైన మహాగణపతి శోభాయాత్ర సెన్సేషన్ థియేటర్, రాజ్దూత్ చౌరస్తా, టెలిఫోన్ భవన్, ఇక్బాల్ మినార్, తెలంగాణ తల్లి చౌరస్తా మీదుగా ఎన్టీఆర్ మార్గ్కు చేరుకుంది. మార్గమంతా భక్తులు గణపతి బప్పా మోరియా అంటూ నినాదాలతో సందడి చేశారు.
ఎన్టీఆర్ మార్గ్లోని క్రేన్ నంబర్ 4 వద్ద ఉత్సవ కమిటీ సభ్యులు ప్రత్యేక పూజలు నిర్వహించిన అనంతరం మధ్యాహ్నం 2.15 గంటలకు భారీ క్రేన్ల సహాయంతో మహాగణపతి విగ్రహాన్ని హుస్సేన్సాగర్లో నిమజ్జనం చేశారు. తమ ఆరాధ్య దైవానికి భక్తులు కన్నీటి వీడ్కోలు పలికారు. పోలీసులు పటిష్ఠ బందోబస్తు ఏర్పాటు చేయడంతో ఎలాంటి అవాంఛనీయ ఘటనలు చోటుచేసుకోకుండా నిమజ్జనం ప్రశాంతంగా పూర్తైంది.
