చిన్న అలవలపాడు సర్పంచ్ అభ్యర్థిగా లక్ష్మీ సౌజన్య శీలం ప్రకటన

పంచాయతీ ఎన్నికల్లో పార్టీ బలపరిచిన అభ్యర్థి విజయానికి సమష్టిగా కృషి చేయాలి: వైఎస్సార్‌సీపీ కనిగిరి ఇన్‌చార్జి దద్దాల నారాయణ యాదవ్

కనిగిరి: రానున్న గ్రామ పంచాయతీ ఎన్నికల్లో వైఎస్సార్ కాంగ్రెస్ పార్టీ బలపరిచిన అభ్యర్థుల విజయమే లక్ష్యంగా నాయకులు, కార్యకర్తలు సమన్వయంతో పనిచేయాలని కనిగిరి నియోజకవర్గ వైఎస్సార్‌సీపీ ఇన్‌చార్జి డాక్టర్ దద్దాల నారాయణ యాదవ్ పిలుపునిచ్చారు. ఎన్నికలను ప్రతిష్టాత్మకంగా తీసుకుని పార్టీ శ్రేణులంతా ఐక్యంగా ముందుకు సాగాలని సూచించారు.

స్థానిక వైఎస్సార్‌సీపీ కార్యాలయంలో శుక్రవారం సాయంత్రం కనిగిరి మండల పార్టీ అధ్యక్షుడు మడతల కస్తూరి రెడ్డి ఆధ్వర్యంలో చిన్న అలవలపాడు పంచాయతీకి చెందిన పార్టీ నాయకులు, కార్యకర్తలతో పంచాయతీ ఎన్నికల సన్నాహక సమావేశం నిర్వహించారు. ఈ సమావేశంలో రానున్న ఎన్నికల్లో అనుసరించాల్సిన వ్యూహాలు, చేపట్టాల్సిన కార్యాచరణపై నాయకులు, ముఖ్య కార్యకర్తలు విస్తృతంగా చర్చించారు. అనంతరం సమావేశంలో పాల్గొన్న వారి ఏకాభిప్రాయం మేరకు చిన్న అలవలపాడు పంచాయతీ సర్పంచ్ అభ్యర్థిగా లక్ష్మీ సౌజన్య శీలం పేరును దద్దాల నారాయణ యాదవ్ ప్రకటించారు.

ఈ సందర్భంగా దద్దాల నారాయణ యాదవ్ మాట్లాడుతూ.. గ్రామ పంచాయతీ ఎన్నికలను పార్టీ శ్రేణులంతా ప్రతిష్టాత్మకంగా తీసుకోవాలని అన్నారు. ప్రతి గ్రామంలో పార్టీని మరింత బలోపేతం చేయడంతో పాటు ప్రజలకు నిరంతరం అందుబాటులో ఉంటూ వారి సమస్యలను తెలుసుకుని పరిష్కారానికి కృషి చేయాలని సూచించారు. నాయకులు, కార్యకర్తలు పరస్పర సమన్వయంతో పనిచేస్తూ పార్టీ బలపరిచిన అభ్యర్థుల విజయానికి కృషి చేయాలని పిలుపునిచ్చారు.

ఇటీవల జరిగిన మున్సిపల్, ఎంపీటీసీ, జడ్పీటీసీ ఎన్నికల సందర్భంగా తెలుగుదేశం పార్టీ అధికారాన్ని అడ్డుపెట్టుకుని కనిగిరి నియోజకవర్గంలో అరాచక రాజకీయాలకు పాల్పడిందని ఆయన విమర్శించారు. ఎంపీటీసీ ఎన్నికల సమయంలో నామినేషన్లు దాఖలు చేసేందుకు వెళ్లిన వైఎస్సార్‌సీపీ అభ్యర్థులను నామినేషన్ కేంద్రాల వద్ద పోలీసుల సమక్షంలోనే టీడీపీకి చెందిన వారు అడ్డుకుని, నామినేషన్లు వేయకుండా ఆటంకాలు సృష్టించారని ఆరోపించారు.

అధికార అండతో పోలీసు యంత్రాంగాన్ని రాజకీయ ప్రయోజనాల కోసం ఉపయోగించుకుంటూ ప్రతిపక్ష నాయకులు, కార్యకర్తలపై ఒత్తిళ్లు, బెదిరింపులకు పాల్పడ్డారని దద్దాల నారాయణ యాదవ్ విమర్శించారు. గత ఎన్నికల్లో ఎదురైన అనుభవాలను దృష్టిలో ఉంచుకుని రానున్న పంచాయతీ ఎన్నికల్లో పార్టీ నాయకులు, కార్యకర్తలు మరింత అప్రమత్తంగా ఉండాలని సూచించారు. ఎలాంటి బెదిరింపులకు, ప్రలోభాలకు భయపడకుండా ఐకమత్యంతో ఎన్నికలను ఎదుర్కోవాలని పిలుపునిచ్చారు.

ఈ సమావేశంలో మాజీ సర్పంచ్ శీలం శ్రీనివాసులు రెడ్డి, శీలం వెంకటేశ్వర రెడ్డి, వేమన ఆదినారాయణ, శెట్టిపల్లి సుబ్బారావు, శీలం శివారెడ్డి, మల్లెల యేసు, గాలిబోయిన నాగార్జున, మాలపాటి మాల్యాద్రి, బొబ్బ కోటిరెడ్డి, గొల్లపోలు శ్రీనివాసులు, మండాది బాలనాగిరెడ్డి, ఉండేల కృష్ణారెడ్డి, చిలంకూరు చిన్నకోటయ్య, శెట్టిపల్లి కిషోర్, ఉండేలా వెంకటసుబ్బయ్య, సంగటి పుల్లారెడ్డి, మల్లెల మహేష్, కుమ్మరకుంట ప్రభాకర్, బాలసాని మార్కు, ఏల్లూరు షెడ్రక్, మల్లెలు ఏసు, రోశయ్యతో పాటు పలువురు వైఎస్సార్‌సీపీ నాయకులు, కార్యకర్తలు పాల్గొన్నారు.