మహాదేవపురం పాఠశాల విద్యార్థులకు క్రీడా దుస్తుల బహుకరణ

మధిర: మధిర మండలం మహాదేవపురం జిల్లా పరిషత్ ఉన్నత పాఠశాల విద్యార్థులకు పాఠశాల విశ్రాంత గెజిటెడ్ ప్రధానోపాధ్యాయులు పి.వి.ఎల్.డి. ప్రసాద్ తన సొంత ఖర్చులతో రూ.6 వేల విలువైన క్రీడా దుస్తులను అందజేశారు. శనివారం నుంచి మధిర మండలంలో ప్రారంభమైన మండలస్థాయి క్రీడా పోటీలకు విద్యార్థులు హాజరవుతున్న సందర్భంగా ఈ క్రీడా దుస్తులను ప్రస్తుత ప్రధానోపాధ్యాయులు సిహెచ్. సాధు సమాధానం విద్యార్థులకు అందజేశారు.

ఈ సందర్భంగా ప్రధానోపాధ్యాయులు మాట్లాడుతూ, ఉద్యోగ విరమణ అనంతరం కూడా మహాదేవపురం పాఠశాల విద్యార్థుల పట్ల పి.వి.ఎల్.డి. ప్రసాద్ చూపిస్తున్న అభిమానాన్ని, సేవా భావాన్ని అభినందించారు. విద్యార్థులు క్రీడల్లో ప్రతిభ కనబరిచి పాఠశాలకు మంచి పేరు తీసుకురావాలని ఆకాంక్షించారు. విద్యార్థుల అవసరాలను గుర్తించి సొంత ఖర్చులతో క్రీడా దుస్తులు అందజేసినందుకు ఆయనకు పాఠశాల ఉపాధ్యాయ బృందం కృతజ్ఞతలు తెలిపింది.

ఈ కార్యక్రమంలో ఉపాధ్యాయులు డి. వెంకటేశ్వరరావు, తాళ్లూరి సుబ్బారావు, పోలె సుధాకర్, ఎం. కృష్ణవేణి, వి.ఎల్.పి. కుమారి, ఏ. వినోద్‌రావు, వి. రాములు, పాఠశాల ఫిజికల్ డైరెక్టర్ కె. వేణుగోపాలరావు తదితరులు పాల్గొన్నారు.