మునుగోడు నియోజకవర్గంలోని మండలాలు కరువు మండలాలుగా ప్రకటన

రాజగోపాల్ రెడ్డి చొరవతో ప్రభుత్వానికి నివేదికలు అందించారని ప్రకటన

మునుగోడు, అక్టోబర్ 28 | ఎన్ టుడే న్యూస్‌:

మునుగోడు నియోజకవర్గంలోని అన్ని మండలాలను కరువు మండలాలుగా తెలంగాణ ప్రభుత్వం ప్రకటించినట్లు సమాచారం. వర్షాధార వ్యవసాయంపై ఆధారపడిన ఈ ప్రాంతంలో పంటలు ఎండిపోవడంతో రైతులు తీవ్రంగా నష్టపోయిన నేపథ్యంలో ఈ నిర్ణయం ప్రాధాన్యం సంతరించుకుంది.

నియోజకవర్గంలోని వ్యవసాయ పరిస్థితులు, రైతులు ఎదుర్కొంటున్న సమస్యలను ప్రభుత్వం దృష్టికి తీసుకెళ్లడంలో ఎమ్మెల్యే రాజగోపాల్ రెడ్డి కీలకంగా వ్యవహరించారని ఆయన వర్గాలు తెలిపాయి. జిల్లా కలెక్టర్లు, వ్యవసాయ శాఖ అధికారులతో పరిస్థితులపై ఎప్పటికప్పుడు చర్చించి, క్షేత్రస్థాయి వివరాలతో ప్రభుత్వానికి నివేదికలు అందించేలా కృషి చేసినట్లు పేర్కొన్నాయి.

మునుగోడు నియోజకవర్గంలోని అన్ని మండలాలను కరువు మండలాలుగా ప్రకటించడం వల్ల రైతులకు ప్రభుత్వ సహాయం అందే అవకాశం ఉందని భావిస్తున్నారు. తాగునీటి సరఫరా, పశుగ్రాసం అందుబాటు, ఉపాధి హామీ పనులపై ప్రభుత్వం ప్రత్యేక దృష్టి సారించే అవకాశం ఉందని ప్రకటనలో పేర్కొన్నారు.