పేదలకు తక్కువ ఖర్చుతో వైద్య సేవలు.. రైతులకు 50 శాతం రాయితీ

పెర్కిట్ ఎంజే ఆసుపత్రి అధిపతి డాక్టర్ మధుశేఖర్ ప్రకటన.. ప్రతి నెల ఇద్దరు మహిళలకు ఉచిత కుటుంబ నియంత్రణ ఆపరేషన్లు

ఆర్మూర్, నవంబర్ 10 (ఎన్ టుడే న్యూస్):

నిరుపేదలకు మెరుగైన వైద్య సేవలను తక్కువ ఖర్చుతో అందించాలనే ఉద్దేశంతో ఆర్మూర్ మండలం పెర్కిట్‌లోని ఎంజే ఆసుపత్రి ప్రత్యేక కార్యక్రమాలను చేపడుతోందని ఆసుపత్రి అధిపతి డాక్టర్ మధుశేఖర్ తెలిపారు. రైతులకు వైద్య సేవల్లో 50 శాతం రాయితీ కల్పించడంతో పాటు పేదలకు తక్కువ ధరకు ఓపీ సేవలు అందిస్తున్నట్లు వెల్లడించారు. ప్రతి నెల ఇద్దరు మహిళలకు ఉచితంగా కుటుంబ నియంత్రణ ఆపరేషన్లు నిర్వహిస్తున్నట్లు పేర్కొన్నారు.

రూ.300 ఓపీ ఫీజు రూ.100కే

సాధారణంగా రూ.300గా ఉన్న ఓపీ ఫీజును పేదల సౌకర్యార్థం ప్రస్తుతం రూ.100 మాత్రమే తీసుకుంటున్నట్లు డాక్టర్ మధుశేఖర్ తెలిపారు. అంతేకాకుండా అవసరమైన వైద్య పరీక్షలను కూడా ఉచితంగా నిర్వహిస్తున్నామని చెప్పారు. రైతులకు వైద్య సేవల్లో 50 శాతం రాయితీ అందించనున్నట్లు వివరించారు.

ప్రతి నెల ఇద్దరు మహిళలకు ఉచిత కుటుంబ నియంత్రణ ఆపరేషన్లు

ప్రభుత్వ ఆసుపత్రుల్లో కుటుంబ నియంత్రణ ఆపరేషన్లు జరగడం లేదని, ఈ నేపథ్యంలో పేద మహిళలకు సహాయం చేయాలనే ఉద్దేశంతో తమ ఆసుపత్రిలో ప్రతి నెల ఇద్దరు మహిళలకు ఉచితంగా కుటుంబ నియంత్రణ ఆపరేషన్లు నిర్వహిస్తున్నట్లు డాక్టర్ మధుశేఖర్ వెల్లడించారు. ఆర్థిక ఇబ్బందుల కారణంగా వైద్య సేవలు పొందలేని మహిళలకు ఈ కార్యక్రమం ఉపయోగపడుతుందని తెలిపారు.

30 ఏళ్లుగా పెర్కిట్‌లో వైద్య సేవలు

పెర్కిట్‌లో గత 30 సంవత్సరాలుగా ఎంజే ఆసుపత్రిని నిర్వహిస్తూ ప్రజలకు వైద్య సేవలు అందిస్తున్నామని డాక్టర్ మధుశేఖర్ పేర్కొన్నారు. పేదలు, రైతులకు వైద్య ఖర్చుల భారం తగ్గించేలా రాయితీలు, ఉచిత సేవలు కొనసాగిస్తామని తెలిపారు. ప్రజలు ఈ అవకాశాలను సద్వినియోగం చేసుకోవాలని ఆయన సూచించారు.