కందుకూరు ప్రభుత్వ ఆసుపత్రిలో అక్టోబర్ 7న మెగా వైద్య శిబిరం
కందుకూరు: ప్రధానమంత్రి నరేంద్ర మోదీ 25 ఏళ్ల ప్రజాసేవను పురస్కరించుకుని దేశవ్యాప్తంగా నిర్వహిస్తున్న ‘సేవా సంకల్ప్‌ అభియాన్‌–2026’లో భాగంగా కందుకూరు ఏరియా ప్రభుత్వ ఆసుపత్రిలో మెగా వైద్య శిబిరాన్ని నిర్వహించనున్నట్లు ఆసుపత్రి మెడికల్‌ సూపరింటెండెంట్‌ డాక్టర్‌ ఇంద్రాణి తెలిపారు.
అక్టోబర్ 7న బుధవారం ఉదయం 9 గంటలకు కందుకూరు ఏరియా ప్రభుత్వ ఆసుపత్రి ప్రాంగణంలో మెగా వైద్య శిబిరం ప్రారంభం కానుంది. కందుకూరు ఎమ్మెల్యే ఇంటూరి నాగేశ్వరరావు ముఖ్య అతిథిగా హాజరై శిబిరాన్ని ప్రారంభించనున్నట్లు తెలిపారు.
శిబిరంలో కందుకూరు పట్టణంతో పాటు పరిసర ప్రాంతాల ప్రజలకు వైద్యుల సలహాలు, ఆరోగ్యంపై అవగాహన కల్పించడంతో పాటు పలు రకాల వైద్య పరీక్షలు నిర్వహించేందుకు ఏర్పాట్లు చేస్తున్నట్లు డాక్టర్‌ ఇంద్రాణి తెలిపారు. ఎక్స్‌రే, ఈసీజీ, స్కానింగ్‌తో పాటు వివిధ రకాల రక్త పరీక్షలు నిర్వహించనున్నట్లు పేర్కొన్నారు.
వ్యాధులను ముందస్తుగా గుర్తించడంతో పాటు ప్రజల్లో ఆరోగ్యంపై అవగాహన పెంచేందుకు ఇలాంటి వైద్య శిబిరాలు ఉపయోగపడతాయని ఆమె తెలిపారు. ప్రజలు తమ ఆరోగ్య సమస్యలను నిర్లక్ష్యం చేయకుండా ఈ అవకాశాన్ని సద్వినియోగం చేసుకోవాలని సూచించారు.
ముఖ్యంగా వృద్ధులు, మహిళలు, పిల్లలు, దీర్ఘకాలిక అనారోగ్య సమస్యలతో బాధపడుతున్న వారు వైద్య శిబిరానికి హాజరై వైద్యుల సలహాలు పొందాలని డాక్టర్‌ ఇంద్రాణి కోరారు.
