Eluru: చాట్రాయి మండలంలో రేపు మంత్రి పార్థసారథి విస్తృత ప్రచారం

చనుబండ, సూరంపాలెంలో బైక్ ర్యాలీలు.. మరో ఆరు గ్రామాల్లో ప్రజలతో సమావేశాలు 

ఏలూరు జిల్లా, నూజివీడు: జెడ్పీటీసీ, ఎంపీటీసీ ఎన్నికల్లో కూటమి అభ్యర్థుల విజయమే లక్ష్యంగా రాష్ట్ర మంత్రి కొలుసు పార్థసారథి చాట్రాయి మండలంలో మంగళవారం (నవంబర్ 3) విస్తృత ఎన్నికల ప్రచారం నిర్వహించనున్నారు. ఇందులో భాగంగా ఉదయం 8 గంటలకు చనుబండ, సూరంపాలెం గ్రామాల్లో నిర్వహించే బైక్ ర్యాలీల్లో మంత్రి పాల్గొని కూటమి అభ్యర్థులకు మద్దతుగా ప్రచారం చేయనున్నారు. అనంతరం నరసింహారావుపాలెం, సి. గుడిపాడు, పర్వతాపురం, పోతనపల్లి, బూరుగూడెం, చిత్తాపూర్ గ్రామాల్లో పర్యటించి ఎన్నికల ప్రచారం నిర్వహించనున్నారు. ఆయా గ్రామాల్లో ప్రజలతో సమావేశమై ఎన్నికల్లో కూటమి అభ్యర్థులకు మద్దతు ఇవ్వాలని కోరనున్నారు. మంత్రి పర్యటన నేపథ్యంలో ఆయా గ్రామాల్లో పార్టీ నాయకులు, కార్యకర్తలు ప్రచార కార్యక్రమాల ఏర్పాట్లలో నిమగ్నమయ్యారు. మంత్రి పర్యటన వివరాలను నూజివీడులోని మంత్రి క్యాంపు కార్యాలయం వెల్లడించింది.