జాతీయస్థాయి క్రికెట్ శిక్షణకు ఎంపికైన యువ బౌలర్ అవినాష్‌కు ఎమ్మెల్యే సత్కారం

గ్రామీణ ప్రాంతం నుంచి జాతీయస్థాయి శిక్షణకు ఎంపిక కావడంపై అభినందన.. భవిష్యత్తులో దేశానికి పేరు తీసుకురావాలని ఆకాంక్ష

ఆత్రేయపురం: గ్రామీణ ప్రాంతం నుంచి క్రికెట్‌లో ప్రతిభ కనబరిచి జాతీయస్థాయి శిక్షణకు ఎంపికైన 16 ఏళ్ల యువ ఫాస్ట్ బౌలర్ కొత్తపల్లి అవినాష్‌ను ఎమ్మెల్యే బండారు రావు అభినందించి సత్కరించారు. ఆత్రేయపురం మండలం ర్యాలి గ్రామానికి చెందిన అవినాష్ గురువారం ఎమ్మెల్యేను కలవగా, ఆయన ప్రత్యేకంగా అభినందనలు తెలిపారు.

చిన్న వయసులోనే క్రికెట్‌లో ప్రతిభను ప్రదర్శిస్తూ జాతీయస్థాయి శిక్షణకు ఎంపిక కావడం అభినందనీయమని ఎమ్మెల్యే పేర్కొన్నారు. గ్రామీణ ప్రాంతాల్లోనూ ఎంతో ప్రతిభ కలిగిన క్రీడాకారులు ఉన్నారని, వారికి సరైన శిక్షణ, ప్రోత్సాహం లభిస్తే ఉన్నత స్థాయికి చేరుకునే అవకాశాలు ఉంటాయని అన్నారు.

జాతీయస్థాయి శిక్షణను సద్వినియోగం చేసుకుని మెరుగైన నైపుణ్యాలు సాధించాలని అవినాష్‌కు సూచించారు. శిక్షణ అనంతరం ఫాస్ట్ బౌలర్‌గా రాణించి భవిష్యత్తులో దేశానికి కీర్తి ప్రతిష్ఠలు తీసుకురావాలని ఆకాంక్షించారు.

ఈ కార్యక్రమంలో జడ్పీటీసీ విజేత గూడపాటి శ్రీనివాసరావు, మాజీ సర్పంచ్ పి. పుల్లంరాజు వర్మ, పెండెం వెంకన్న, మెర్ల నాగేశ్వరరావు తదితరులు పాల్గొన్నారు.