ఉద్యమ నేత జంగం రాజు మృతి.. ఎల్కతుర్తిలో విషాదం
హనుమకొండ: ఎల్కతుర్తి మండలానికి చెందిన తెలంగాణ ఉద్యమ నేత జంగం రాజు మృతి చెందారు. తెలంగాణ ఉద్యమ సమయంలో ఉద్యమకారులను ముందుండి నడిపించిన రాజు మృతి పట్ల ఎల్కతుర్తి మండలంలో విషాద ఛాయలు అలుముకున్నాయి. ముఖ్యంగా యువత, తోటి ఉద్యమకారులు ఆయన మృతితో తీవ్ర దిగ్భ్రాంతికి గురయ్యారు.
ఎల్కతుర్తి గ్రామ శాఖ అధ్యక్షుడిగా రాజు విశేష సేవలు అందించారు. తెలంగాణ ఉద్యమ సమయంలో యువకులను పెద్ద ఎత్తున ఉద్యమంలోకి తీసుకురావడంతో పాటు వివిధ కార్యక్రమాల్లో చురుగ్గా పాల్గొన్నారు. వంటా వార్పు వంటి కార్యక్రమాల్లోనూ ఆయన కీలకంగా వ్యవహరించారు.
ఆటో డ్రైవర్గా జీవనం సాగించిన రాజు తెలంగాణ ఉద్యమ సమయంలో వినూత్న రీతిలో నిరసన తెలిపారు. సగం గుండు గీయించుకుని ఉద్యమానికి మద్దతుగా నిరసన వ్యక్తం చేయడం ద్వారా ప్రత్యేక గుర్తింపు పొందారని తోటి ఉద్యమకారులు, గ్రామస్థులు గుర్తు చేసుకున్నారు.
జంగం రాజు మృతి విషయం తెలుసుకున్న హుస్నాబాద్ నియోజకవర్గంలోని వివిధ మండలాలు, గ్రామాలకు చెందిన తోటి ఉద్యమకారులు ఎల్కతుర్తికి చేరుకుని పార్థివదేహానికి పూలమాలలు వేసి నివాళులర్పించారు. తెలంగాణ ఉద్యమంలో రాజు పోషించిన పాత్ర మరువలేనిదని గ్రామస్థులు, ఉద్యమకారులు పేర్కొన్నారు.
రాజుకు ఇద్దరు పిల్లలు ఉన్నారని తెలిపారు. ఆటో డ్రైవర్గా కుటుంబాన్ని పోషించిన రాజు మృతితో ఆయన కుటుంబం ఆర్థికంగా ఇబ్బందులు ఎదుర్కొనే అవకాశం ఉందని, ప్రభుత్వం స్పందించి కుటుంబాన్ని ఆదుకోవాలని తోటి ఉద్యమకారులు కోరారు.
