స్థానిక సంస్థల ఎన్నికల ఏర్పాట్లపై పరిశీలకురాలు పి. ప్రశాంతి సమీక్ష
సమస్యాత్మక గ్రామాలపై ప్రత్యేక దృష్టి సారించాలని అధికారులకు సూచన
స్థానిక సంస్థల ఎన్నికలు | ఎన్ టుడే న్యూస్‌:
మండల ప్రజా పరిషత్ కార్యాలయాన్ని స్థానిక సంస్థల ఎన్నికల పరిశీలకురాలు, ఐఏఎస్ అధికారి పి. ప్రశాంతి సందర్శించారు. ఈ సందర్భంగా మండలంలో జరగనున్న స్థానిక సంస్థల ఎన్నికల సన్నద్ధత, ఏర్పాట్లు, ఇతర సంబంధిత అంశాలపై అధికారులతో సమీక్ష నిర్వహించారు.
మండలంలోని అత్యంత సమస్యాత్మక, సమస్యాత్మక గ్రామాలకు సంబంధించిన వివరాలను అధికారులను అడిగి తెలుసుకున్నారు. ఆయా గ్రామాలను సమస్యాత్మకంగా గుర్తించడానికి గల కారణాలు, గత ఎన్నికల సమయంలో ఎదురైన పరిస్థితులు, ప్రస్తుత పరిస్థితులు, ఎన్నికల నిర్వహణకు తీసుకుంటున్న ముందస్తు చర్యలపై సమీక్షించారు.
ఎన్నికలను ప్రశాంత వాతావరణంలో, స్వేచ్ఛగా, నిష్పక్షపాతంగా నిర్వహించేందుకు అవసరమైన చర్యలు చేపట్టాలని అధికారులకు సూచించారు. సమస్యాత్మక గ్రామాలపై ప్రత్యేక దృష్టి సారించాలని, అక్కడి పరిస్థితులను ఎప్పటికప్పుడు పర్యవేక్షించాలని, సంబంధిత శాఖల అధికారులు సమన్వయంతో పనిచేయాలని తెలిపారు.
ఈ కార్యక్రమంలో రిటర్నింగ్ అధికారి వి.ఆర్. రుద్ర, అసిస్టెంట్ రిటర్నింగ్ అధికారులు పి.వి.ఆర్.కె. రాజు, ఆర్.డి. రామచంద్రమూర్తి తదితరులు పాల్గొన్నారు.
