లైసెన్సులు ఉన్న బయో ఉత్పత్తులను మాత్రమే విక్రయించాలి
విస్సన్నపేట: లైసెన్సులు ఉన్న బయో ఉత్పత్తులను మాత్రమే విక్రయించాలని సహాయ వ్యవసాయ సంచాలకులు కె. శశికళ ఎరువుల డీలర్లకు సూచించారు. విస్సన్నపేటలోని పలు ఎరువుల దుకాణాలను మంగళవారం సహాయ వ్యవసాయ సంచాలకులు కె. శశికళ, మండల వ్యవసాయాధికారి జి. రాజ్యలక్ష్మి తనిఖీ చేశారు.
తనిఖీల్లో భాగంగా దుకాణాల్లో ఉన్న బయో ఉత్పత్తుల నిల్వలను పరిశీలించడంతో పాటు వాటికి సంబంధించిన కంపెనీ లైసెన్సులు, ఓ ఫారాలను అధికారులు తనిఖీ చేశారు. కంపెనీ ఆధారిత లైసెన్సులు, ఓ ఫారాలు లేని బయో ఉత్పత్తుల నిల్వలను గుర్తించి వాటి విక్రయాలను తాత్కాలికంగా నిలిపివేశారు.
లైసెన్సులు, అవసరమైన అనుమతులు లేకుండా బయో ఉత్పత్తులను విక్రయిస్తే చట్టపరమైన చర్యలు తీసుకుంటామని ఏడీఏ కె. శశికళ హెచ్చరించారు. రైతులకు నాణ్యమైన, అనుమతులు ఉన్న వ్యవసాయ ఉత్పత్తులు మాత్రమే అందేలా ఎరువుల డీలర్లు నిబంధనలను తప్పనిసరిగా పాటించాలని ఆమె సూచించారు.
