తిరువూరులో ఆపరేషన్ త్రిశూల్‌.. ప్రజల భద్రతే లక్ష్యం, ప్రతి ప్రాణం రక్షణే ధ్యేయం

తిరువూరు: ఎన్టీఆర్ జిల్లా రూరల్ జోన్ పరిధిలో డ్రగ్స్‌ అక్రమ రవాణా, వినియోగానికి అడ్డుకట్ట వేయడంతో పాటు మహిళల భద్రత, రోడ్డు ప్రమాదాల నివారణ లక్ష్యంగా పోలీసులు ప్రత్యేక కార్యాచరణకు శ్రీకారం చుట్టారు. జిల్లా పోలీస్ కమిషనర్ ఎస్.వి. రాజశేఖర బాబు ఆదేశాల మేరకు రూరల్ డీసీపీ బి. లక్ష్మీనారాయణ ఐపీఎస్ ఆధ్వర్యంలో తిరువూరు శాసనసభ్యులు కొలికపూడి శ్రీనివాసరావు సమక్షంలో ఆపరేషన్ త్రిశూల్ ప్రారంభించారు.

ప్రజల భద్రతకు అత్యంత ప్రాధాన్యం ఇస్తూ డ్రగ్స్‌ నియంత్రణ, మహిళలపై నేరాల కట్టడి, రహదారి ప్రమాదాల నివారణపై పోలీసులు ప్రత్యేక దృష్టి సారించనున్నారు. ఇప్పటికే చేపట్టిన చర్యల ఫలితంగా రోడ్డు ప్రమాదాలు 50.4 శాతం, ఎన్‌డీపీఎస్‌ కేసులు 81.4 శాతం తగ్గినట్లు పోలీసుల గణాంకాలు వెల్లడిస్తున్నాయి. అదే విధంగా మహిళలపై నేరాలు 14.8 శాతం, మొత్తం నేరాల సంఖ్య 16.5 శాతం తగ్గినట్లు పేర్కొన్నారు.

ఆపరేషన్ త్రిశూల్‌లో భాగంగా డ్రగ్స్‌ రహిత ప్రాంతాల నిర్మాణం, మహిళలు సురక్షితంగా ఉండే వాతావరణం కల్పించడం, ప్రమాదాలకు కారణమయ్యే అంశాలను గుర్తించి నివారించడం వంటి చర్యలకు ప్రాధాన్యం ఇవ్వనున్నారు. యువత డ్రగ్స్‌కు దూరంగా ఉండేలా అవగాహన కార్యక్రమాలు నిర్వహించడంతో పాటు అక్రమ రవాణా, విక్రయాలపై కఠిన చర్యలు తీసుకోనున్నారు.

జీరో డ్రగ్స్‌.. మహిళలపై అఘాయిత్యాలకు జీరో టాలరెన్స్‌.. సురక్షితమైన రోడ్లు అనే లక్ష్యంతో ఆపరేషన్ త్రిశూల్‌ను కొనసాగిస్తూ ప్రజలకు మరింత భద్రత కల్పించేందుకు పోలీసులు చర్యలు చేపడుతున్నారు.