పెనుగొలనులో జిల్లా పరిషత్ హైస్కూల్ పేరెంట్స్ కమిటీ ఎన్నిక

చైర్మన్‌గా ఆదూరి ఆంజనేయులు.. వైస్ చైర్మన్‌గా షేక్ షక్రూన్

ఎన్టీఆర్ జిల్లా తిరువూరు నియోజకవర్గం గంపలగూడెం మండలం పెనుగొలని గ్రామంలోని కోట మార్కండేయ జిల్లా పరిషత్ ఉన్నత పాఠశాలలో మంగళవారం పేరెంట్స్ కమిటీ ఎన్నికలు నిర్వహించారు. ఈ ఎన్నికల్లో చైర్మన్‌గా ఆదూరి ఆంజనేయులు, వైస్ చైర్మన్‌గా షేక్ షక్రూన్ ఎన్నికయ్యారు. వీరితో పాటు 15 మంది కమిటీ సభ్యులను ఎన్నుకున్నారు.

ఎన్నికైన చైర్మన్, వైస్ చైర్మన్‌తో పాటు కమిటీ సభ్యులు ప్రమాణ స్వీకారం చేసిన అనంతరం సమావేశం నిర్వహించారు. ఈ సందర్భంగా పాఠశాలలో విద్యార్థులకు మెరుగైన విద్యా ప్రమాణాలు అందించడం, విద్యార్థుల విద్యాభివృద్ధికి అవసరమైన చర్యలు చేపట్టడం, పాఠశాల అభివృద్ధితో పాటు మౌలిక వసతులను మెరుగుపరచడంపై చర్చించారు. పాఠశాల అభివృద్ధి కోసం ఉపాధ్యాయులు, తల్లిదండ్రులు, కమిటీ సభ్యులు సమన్వయంతో పనిచేయాలని నిర్ణయించారు.

ఎన్నికైన చైర్మన్ ఆదూరి ఆంజనేయులు, వైస్ చైర్మన్ షేక్ షక్రూన్, కమిటీ సభ్యులను పాఠశాల ప్రధానోపాధ్యాయులు ఎం. దుర్గాప్రసాద్, ఉపాధ్యాయులు అభినందించారు. అలాగే తెలుగుదేశం పార్టీ గ్రామ అధ్యక్షులు బొలగాని కోటేశ్వరరావు, మాజీ సహకార సంఘం అధ్యక్షులు నంబూరి శ్రీనివాసరావు, కోట నాగేశ్వరరావు, నీటి సంఘం అధ్యక్షులు మోటకట్ల రాజారెడ్డి, కొండేటి వెంకటప్పయ్య, మెట్టగుట్ట ఆలయ కమిటీ చైర్మన్ పంది వెంకట్రావు, మాజీ సర్పంచ్ సంగెపు నారాయణ, గ్రామ తెలుగుదేశం పార్టీ ఉపాధ్యక్షులు పంతంగి సాయికుమార్, జనసేన పార్టీ నాయకులు డాక్టర్ బండారు గోపి తదితరులు నూతన కమిటీ సభ్యులకు అభినందనలు తెలిపారు.