శ్రీ వైష్ణవి దేవి ఆలయంలో వైభవంగా పంచామృతాభిషేకం

అన్నమయ్య జిల్లా, చౌడేపల్లి (ఎన్ టుడే న్యూస్): చౌడేపల్లి మండలం పుదీపట్ల గ్రామంలోని స్వయంభు శ్రీ వైష్ణవి దేవి ఆలయంలో శుక్రవారం ప్రత్యేక పూజా కార్యక్రమాలు భక్తిశ్రద్ధలతో నిర్వహించారు. ఈ సందర్భంగా అమ్మవారికి పంచామృతాభిషేకం నిర్వహించి ప్రత్యేకంగా అలంకరించారు.

ఆలయ అర్చకురాలు శ్రావణి శుక్రవారం తెల్లవారుజామునే అమ్మవారికి పంచామృతాభిషేకం నిర్వహించి ప్రత్యేక పూజలు చేశారు. అనంతరం భక్తులకు అమ్మవారి దర్శనానికి అవకాశం కల్పించారు.

ఈ సందర్భంగా ఆలయానికి విచ్చేసిన భక్తులు అమ్మవారిని దర్శించుకుని పూజలు నిర్వహించారు. పలువురు భక్తులు అమ్మవారికి వడిబియ్యం సమర్పించి తమ మొక్కులు చెల్లించుకున్నారు.

ఆలయ ధర్మకర్త వినోద్ కుమార్ భక్తులకు తీర్థప్రసాదాలు అందజేశారు. శుక్రవారం ప్రత్యేక పూజల సందర్భంగా ఆలయ ప్రాంగణం భక్తులతో సందడిగా మారింది.