సీఎం చంద్రబాబును కలిసిన ప్రగడ నాగేశ్వరరావు.. యలమంచిలి సమస్యలపై వినతి

యలమంచిలి, NToday News, సెప్టెంబర్ 26: ఆంధ్రప్రదేశ్ రోడ్ డెవలప్‌మెంట్ కార్పొరేషన్ (ఏపీఆర్డీసీ) చైర్మన్, యలమంచిలి నియోజకవర్గ టీడీపీ ఇన్‌చార్జ్ ప్రగడ నాగేశ్వరరావు శుక్రవారం సచివాలయంలో ముఖ్యమంత్రి చంద్రబాబు నాయుడును కలిశారు. నియోజకవర్గ అభివృద్ధి, దీర్ఘకాలంగా పరిష్కారం కాని ప్రజా సమస్యలు, కార్యకర్తల సంక్షేమానికి సంబంధించిన పలు అంశాలను సీఎం దృష్టికి తీసుకెళ్లి వినతిపత్రాలు అందజేశారు. ప్రగడ నాగేశ్వరరావు ఏపీఆర్డీసీ చైర్మన్‌గా ఉన్నట్లు రాష్ట్ర ప్రభుత్వ సంబంధిత వెబ్‌సైట్లలో నమోదై ఉంది.

ఈ సందర్భంగా దుప్పిటూరు గ్రామ సమస్యలను సీఎం దృష్టికి తీసుకెళ్లారు. బ్రాండిక్స్ పరిశ్రమల కారణంగా గ్రామ పరిసరాల్లో వాయు, జల కాలుష్య సమస్యలు పెరిగాయని గ్రామస్థులు ఆందోళన వ్యక్తం చేస్తున్నారని తెలిపారు. 2004-05లో హామీ ఇచ్చిన ప్రత్యేక పునరావాస కాలనీ, ప్యాకేజీలు ఇంకా అమలు కాలేదని వివరించారు.

దుప్పిటూరు గ్రామానికి చెందిన దేశంరెడ్డి ఎల్లయ్య నాయుడు, దేశంశెట్టి అప్పలనాయుడు, బద్ది తాతాజీ, దేశంరెడ్డి వెంకటరమణ, దేశంశెట్టి కాసు బాబు, ప్రగడ రాజులను సీఎం వద్దకు తీసుకెళ్లి వారి సమస్యలను నేరుగా వివరించినట్లు తెలిపారు. గ్రామ సమస్యల పరిష్కారంతో పాటు యువతకు ఉపాధి అవకాశాల కల్పనకు చర్యలు తీసుకోవాలని కోరారు.

‘ఏడుమూర్ల గట్టు’ పునర్నిర్మాణానికి విజ్ఞప్తి

శారదా నది పరీవాహక ప్రాంతంలోని చారిత్రక ‘ఏడుమూర్ల గట్టు’ పునర్నిర్మాణాన్ని త్వరితగతిన చేపట్టాలని ప్రగడ నాగేశ్వరరావు సీఎం వద్ద వినతిపత్రం సమర్పించారు. గట్టు పునర్నిర్మాణం పూర్తయితే సుమారు 4 వేల ఎకరాల ఆయకట్టుకు సాగునీటి ప్రయోజనం కలుగుతుందని, వరదల సమయంలో ముంపునకు గురయ్యే 10 గ్రామాల పరిధిలోని సుమారు 15 వేల మంది ప్రజలకు ప్రాణ, ఆస్తి నష్టాల నుంచి రక్షణ కల్పించే అవకాశం ఉంటుందని వివరించారు.

కార్యకర్తల వైద్య సహాయంపై వినతి

అనారోగ్యంతో బాధపడుతున్న నియోజకవర్గ కార్యకర్తలకు సంబంధించిన రూ.10 లక్షలకు పైబడిన సీఎం సహాయనిధి (సీఎంఆర్ఎఫ్) దరఖాస్తులను సీఎం దృష్టికి తీసుకెళ్లినట్లు తెలిపారు. సంబంధిత దరఖాస్తులను పరిశీలించి బాధితులకు తక్షణ వైద్య సహాయం అందేలా చర్యలు తీసుకోవాలని కోరారు.

కొయ్య శ్రీనివాస్ కుటుంబానికి అండగా ఉండాలని విజ్ఞప్తి

పిన్న వయస్సులోనే సర్పంచ్‌గా ఎన్నికై ఇటీవల గుండెపోటుతో మృతి చెందిన యువనేత కొయ్య శ్రీనివాస్ ఘటనను కూడా ప్రగడ నాగేశ్వరరావు సీఎం దృష్టికి తీసుకెళ్లారు. శ్రీనివాస్ కుటుంబానికి ప్రభుత్వం, పార్టీ తరఫున అండగా నిలవాలని కోరారు.

శ్రీనివాస్ మృతిపై సీఎం చంద్రబాబు సంతాపం వ్యక్తం చేసి, ఆయన కుటుంబానికి అండగా ఉంటామని హామీ ఇచ్చినట్లు ప్రగడ నాగేశ్వరరావు తెలిపారు.