శ్రీ సరస్వతీ శిశు మందిరం భవన నిర్మాణ పనులను పరిశీలించిన ప్రముఖులు

రాయికల్: రాయికల్ పట్టణంలోని శ్రీ సరస్వతీ శిశు మందిరం నూతన భవన నిర్మాణ పనుల్లో భాగంగా మంగళవారం కొనసాగుతున్న స్లాబ్ పనులను భవన నిర్మాణ కమిటీ సభ్యులు, పలువురు ప్రముఖులు పరిశీలించారు.

భవన నిర్మాణ కమిటీ అధ్యక్షుడు బోడుగం మోహన్ రెడ్డి, రాష్ట్ర ఓబీసీ మోర్చా ఉపాధ్యక్షుడు మచ్చ నారాయణ, డాక్టర్ తురగ రాజారెడ్డి, బండారు కమలాకర్ రావు, జిల్లా విద్యాపీఠం కార్యదర్శి కూర్మ పెద్ద మల్లారెడ్డి తదితరులు నిర్మాణ ప్రదేశాన్ని సందర్శించారు.

ఈ సందర్భంగా భవన నిర్మాణ పనుల పురోగతిని పరిశీలించిన వారు, ఇప్పటివరకు పూర్తయిన పనులు, ప్రస్తుతం కొనసాగుతున్న స్లాబ్ పనుల వివరాలను తెలుసుకున్నారు. భవన నిర్మాణాన్ని నిర్ణీత ప్రణాళిక ప్రకారం పూర్తి చేసేందుకు అవసరమైన సహకారం, తదుపరి చేపట్టాల్సిన కార్యాచరణపై చర్చించారు.

విద్యా సేవలకు మరింత తోడ్పాటు అందించే లక్ష్యంతో శ్రీ సరస్వతీ శిశు మందిరం అభివృద్ధి, నూతన భవన నిర్మాణ కార్యక్రమాన్ని కొనసాగిస్తున్నామని నిర్వాహకులు తెలిపారు. విద్యార్థులకు మెరుగైన విద్యా వాతావరణం కల్పించేందుకు చేపడుతున్న ఈ నిర్మాణానికి దాతలు, విద్యాభిమానులు, ప్రజలు తమ వంతు సహకారం అందించాలని కోరారు.

ఈ కార్యక్రమంలో గాజేంగి అశోక్, బొమ్మకంటి రాంగోపాల్, కడకుంట్ల ప్రభాకర్, మామిడాల లక్ష్మీనారాయణ, బిరుదరాజు సుభాష్ రాజు, చౌడారపు సతీష్, సింగు నరేష్ తదితరులు పాల్గొన్నారు.