రాష్ట్రస్థాయి కబడ్డీ పోటీలకు క్రీడాకారులకు ఆరు రోజుల శిక్షణ శిబిరం

మధిర, సెప్టెంబర్ 26: ఖమ్మం జిల్లా కబడ్డీ అసోసియేషన్ ఆధ్వర్యంలో జిల్లా స్థాయి ఎంపికల్లో రాష్ట్రస్థాయి కబడ్డీ పోటీలకు ఎంపికైన క్రీడాకారులకు ఆరు రోజుల ప్రత్యేక శిక్షణ శిబిరం మధిర మినీ స్టేడియంలో ప్రారంభమైంది.

ఖమ్మం జిల్లా కబడ్డీ అసోసియేషన్ ప్రధాన కార్యదర్శి కె. క్రిస్టఫర్ ఆధ్వర్యంలో నిర్వహించిన జిల్లా స్థాయి ఎంపికల్లో ప్రతిభ కనబరిచిన క్రీడాకారులు ఈ శిక్షణ శిబిరానికి ఎంపికయ్యారు. జిల్లా యువజన క్రీడల అధికారి టి. సునీల్ రెడ్డి, స్టేడియం ఇన్‌చార్జి వై. చిన్నీ పర్యవేక్షణలో శిక్షణ కొనసాగుతోంది.

అక్టోబర్ 1 నుంచి 4వ తేదీ వరకు వేములవాడలో జరగనున్న రాష్ట్రస్థాయి కబడ్డీ పోటీలకు క్రీడాకారులను సన్నద్ధం చేసేందుకు ఈ ప్రత్యేక శిక్షణ నిర్వహిస్తున్నారు. కబడ్డీ కోచ్‌లు ప్రవీణ్, శ్రీనివాస్ క్రీడాకారులకు శిక్షణ అందిస్తున్నారు. బ్యాడ్మింటన్ కోచ్ సునీల్ శిబిర నిర్వహణలో సహకరిస్తున్నారు.

శిక్షణ శిబిర ప్రారంభ కార్యక్రమంలో మధిర రెండో వార్డు కౌన్సిలర్ బానోత్ రమణ నాయక్ పాల్గొని క్రీడాకారులకు వసతి, భోజన సదుపాయాల కోసం ఆర్థిక సహాయం అందించనున్నట్లు తెలిపారు. క్రీడాకారులు క్రమశిక్షణతో శిక్షణ పొంది రాష్ట్రస్థాయి పోటీల్లో ప్రతిభ కనబరిచి ఖమ్మం జిల్లాకు మంచి పేరు తీసుకురావాలని ఆకాంక్షించారు.

క్రీడాకారులకు శిక్షణతో పాటు వసతి, భోజన సదుపాయాలు కల్పిస్తూ రాష్ట్రస్థాయి పోటీలకు సిద్ధం చేస్తున్న నిర్వాహకులను క్రీడాభిమానులు అభినందిస్తున్నారు.