సోషల్ మీడియాలో లైకుల కోసం ఆత్మహత్య డ్రామా..
సోషల్ మీడియాలో లైకుల కోసం 'ఆత్మహత్య డ్రామా'.. యువకుడిపై కేసు నమోదు చేసిన కామారెడ్డి పోలీసులు
కామారెడ్డి:
సోషల్ మీడియా పిచ్చితో ప్రాణాలతో చెలగాటం ఆడుతూ, పోలీసుల సమయాన్ని వృథా చేసిన ఓ యువకుడిపై కామారెడ్డి పోలీసులు కేసు నమోదు చేశారు. కేవలం వ్యూస్, లైకుల కోసం ఆత్మహత్య చేసుకుంటున్నట్లు నాటకమాడి ఆ వీడియోను ఇన్స్టాగ్రామ్లో పోస్ట్ చేయడమే ఇందుకు కారణం.
అసలేం జరిగిందంటే..
రెడ్లన్ రోహిత్ అనే యువకుడు ఇన్స్టాగ్రామ్లో తాను ఆత్మహత్యకు పాల్పడుతున్నట్లు ఒక భావోద్వేగపూరిత వీడియోను పోస్ట్ చేశాడు. ఇది చూసిన కామారెడ్డి పట్టణ పోలీసులు వెంటనే అప్రమత్తమై, అది అత్యవసర పరిస్థితిగా భావించి నిమిషాల వ్యవధిలో అతని ఇంటికి చేరుకున్నారు. తీరా విచారణ చేయగా, కేవలం వ్యూస్ మరియు లైక్స్ కోసం తాను ఆ వీడియో రూపొందించినట్లు రోహిత్ ఒప్పుకున్నాడు.
పోలీసుల సమయం వృథా చేయకండి: ఎస్పీ రాజేష్ చంద్ర
ఈ ఘటనపై జిల్లా ఎస్పీ శ్రీ ఎం. రాజేష్ చంద్ర ఐపిఎస్ గారు ఆగ్రహం వ్యక్తం చేశారు.
బాధ్యతారాహిత్యం: వ్యూస్ కోసం ఇలాంటి డ్రామాలు చేయడం అత్యంత బాధ్యతారాహిత్యం. మీ ఒక్క తప్పుడు పోస్ట్ వల్ల పోలీస్ యంత్రాంగం మొత్తం పరుగులు తీయాల్సి వస్తుంది.
నిజమైన బాధితులకు అన్యాయం: పోలీసుల విలువైన సమయం ఇలాంటి వాటి వల్ల వృథా అయితే, నిజంగా ప్రాణాపాయంలో ఉన్న వ్యక్తికి సాయం అందడంలో ఆలస్యం జరిగే ప్రమాదం ఉంది.
కఠిన చర్యలు: ప్రజల భద్రత కోసం పనిచేసే పోలీసుల సమయాన్ని వృథా చేసే వారిపై చట్టపరంగా కఠిన చర్యలు తీసుకుంటామని ఎస్పీ హెచ్చరించారు.
యువతకు సూచన:
క్షణికమైన గుర్తింపు కోసం తప్పుడు మార్గాలు ఎంచుకుని భవిష్యత్తును నాశనం చేసుకోవద్దని, కష్టపడి చదువుకుని జీవితంలో ఉన్నత స్థాయికి చేరుకోవాలని ఎస్పీ సూచించారు. సోషల్ మీడియా మోజులో పడి తల్లిదండ్రుల ఆశలను వమ్ము చేయవద్దని ఆయన హితవు పలికారు.
