తెలంగాణలో బోల్తా పడిన స్కూల్ బస్సు

తెలంగాణలో బోల్తా పడిన స్కూల్ బస్సు.. 37 మంది విద్యార్థులకు తప్పిన పెను ప్రమాదం

తమిళనాడులోని సేలం నుంచి 37 మంది విద్యార్థులు, ఇద్దరు టీచర్లతో కర్నూలు వెళ్తున్న ప్రైవేట్ ట్రావెల్ బస్సు జోగులాంబ గద్వాల జిల్లా బోరవెల్లి సమీపంలో బోల్తా పడింది.

సోమవారం ఉదయం 6.10 గంటల సమయంలో డ్రైవర్ నిద్రమత్తులోకి వెళ్లడంతో అదుపుతప్పి ప్రమాదం జరిగినట్లు మానోపాడు ఎస్సై బి. స్వాతి వెల్లడించారు.

ప్రమాదంలో సుమారు 12 మంది విద్యార్థులకు స్వల్ప గాయాలయ్యాయి. ఎవరికి తీవ్ర గాయాలు కాకపోవడంతో పెను ప్రమాదం తప్పింది. గాయపడిన విద్యార్థులను పోలీసులు సమీప ఆస్పత్రికి తరలించారు. చికిత్స అనంతరం వారిని ఆర్టీసీ బస్సులో కర్నూలుకు పంపించారు.

అక్కడి నుంచి విద్యార్థులు, టీచర్లు తిరిగి సేలం చేరుకునేందుకు స్కూల్ యాజమాన్యం ఏర్పాట్లు చేసింది. ఘటనపై ఇంకా కేసు నమోదు కాలేదు.