రెండు పడక గదుల ఇళ్ల లబ్ధిదారుల ఎంపిక

మంచిర్యాల: మంచిర్యాల మున్సిపల్ కార్పొరేషన్ పరిధిలోని షాదీఖానా మైనారిటీ ఫంక్షన్ హాల్‌లో తెలంగాణ రాష్ట్ర ప్రభుత్వం చేపట్టిన రెండు పడక గదుల ఇళ్ల లబ్ధిదారుల ఎంపిక కార్యక్రమం (లక్కీ డ్రా) నిర్వహించారు. ఈ కార్యక్రమంలో మంచిర్యాల ఎమ్మెల్యే కొక్కిరాల ప్రేమ్ సాగర్ రావు పాల్గొన్నారు.

ఈ సందర్భంగా ఎమ్మెల్యే మాట్లాడుతూ ఇల్లు ప్రతి పేద కుటుంబం కల అని, ఆ కలను సాకారం చేయడమే ప్రజా ప్రభుత్వ లక్ష్యమని తెలిపారు. అర్హులైన కుటుంబాలకు పారదర్శకంగా, న్యాయబద్ధంగా ప్రభుత్వ పథకాల ప్రయోజనాలు అందేలా చర్యలు తీసుకుంటున్నట్లు చెప్పారు.

లక్కీ డ్రా ద్వారా ఎంపికైన లబ్ధిదారుల కుటుంబాల్లో సొంతింటి ఆనందం వెల్లివిరియాలని ఆకాంక్షించారు. అర్హత ఆధారంగా లబ్ధిదారుల ఎంపిక ప్రక్రియను నిర్వహిస్తున్నట్లు తెలిపారు.

కార్యక్రమంలో మంచిర్యాల మున్సిపల్ కమిషనర్ అన్వేష్, మంచిర్యాల తహసీల్దార్ రఫతుల్లా, మున్సిపల్ కార్పొరేషన్ అసిస్టెంట్ కమిషనర్ రాజు, సంబంధిత అధికారులు, లబ్ధిదారులు తదితరులు పాల్గొన్నారు.