135 మంది వైద్యులకు షోకాజ్ నోటీసులు

ఆంధ్రప్రదేశ్‌లో పట్టణ ఆరోగ్య కేంద్రాల్లో రోగులకు సక్రమంగా వైద్య సేవలు అందించడంలో నిర్లక్ష్యం వహించిన 135 మంది వైద్యులకు అధికారులు షోకాజ్ నోటీసులు జారీ చేశారు. వైద్యుల పనితీరును అంచనా వేసేందుకు జూలై నుంచి నవంబరు వరకు ఫోన్‌ ద్వారా రోగుల నుంచి అభిప్రాయాలు సేకరించారు. ఈ సర్వేలో పల్నాడు జిల్లా 81.6 శాతం సంతృప్తి స్థాయితో నమోదైంది. పోలవరం జిల్లా 81.5 శాతం, నెల్లూరు జిల్లా 80.7 శాతంతో తర్వాతి స్థానాల్లో ఉన్నాయి. కర్నూలు జిల్లా 69.5 శాతంతో తక్కువ సంతృప్తి స్థాయిని నమోదు చేసింది. రోగులకు మెరుగైన వైద్య సేవలు అందించడంలో నిర్లక్ష్యం వహించకుండా బాధ్యతాయుతంగా విధులు నిర్వహించాలని అధికారులు స్పష్టం చేశారు.