చింతలపూడిలో అక్రమ మద్యం విక్రయాలపై ఎక్సైజ్ శాఖ కొరడా

50 లీటర్ల బెల్లం ఊట ధ్వంసం.. మహిళ వద్ద 9 మద్యం సీసాలు స్వాధీనం 

ఏలూరు జిల్లా, చింతలపూడి: మండలంలో నాటుసారా తయారీ, అక్రమ మద్యం విక్రయాలకు అడ్డుకట్ట వేసేందుకు ఎక్సైజ్ శాఖ అధికారులు ప్రత్యేక తనిఖీలు చేపట్టారు. జిల్లా ఉన్నతాధికారుల ఆదేశాలతో వివిధ ప్రాంతాల్లో సంయుక్తంగా తనిఖీలు నిర్వహించి అక్రమ కార్యకలాపాలను గుర్తించారు. ఈ క్రమంలో నాటుసారా తయారీకి సిద్ధం చేసిన 50 లీటర్ల పులిసిన బెల్లం మిశ్రమాన్ని ధ్వంసం చేయగా, మరోచోట అక్రమంగా నిల్వ ఉంచిన మద్యం సీసాలను స్వాధీనం చేసుకున్నారు. రేచర్ల గ్రామానికి చెందిన జరబల రాము నాటుసారా తయారీ కోసం సిద్ధం చేసిన బెల్లం ఊటను అధికారులు గుర్తించారు. సుమారు 50 లీటర్ల పరిమాణంలో ఉన్న ఈ మిశ్రమాన్ని అక్కడికక్కడే ధ్వంసం చేశారు. అయితే తనిఖీల సమయంలో రాము అందుబాటులో లేకపోవడంతో అతనిపై కేసు నమోదు చేశారు. యర్రగుంటపల్లిలో నిర్వహించిన తనిఖీల్లో పోతురాజు శారద వద్ద అనుమతులు లేకుండా నిల్వ ఉంచిన తొమ్మిది మద్యం సీసాలను అధికారులు గుర్తించి స్వాధీనం చేసుకున్నారు. ఈ వ్యవహారంపై కేసు నమోదు చేసి, ఆమెను మండల కార్యనిర్వాహక న్యాయాధికారి ఎదుట హాజరుపరిచారు. అనంతరం 129 బీఎన్ఎస్ఎస్ నిబంధనల ప్రకారం బంధపత్రం విధించినట్లు ఎక్సైజ్ అధికారులు తెలిపారు. మరోవైపు మండలంలోని పలు మద్యం విక్రయ కేంద్రాల్లోనూ ఆకస్మిక తనిఖీలు చేపట్టారు. దుకాణాల్లోని మద్యం నిల్వలను లెక్కించడంతో పాటు, ప్రభుత్వ మద్యం సరఫరా సంస్థ నుంచి వచ్చిన సీసాలపై ఉన్న గుర్తింపు ముద్రలు, క్యూఆర్ సంకేతాలను పరిశీలించారు. ఏపీ సురక్ష అనువర్తనం ద్వారా సీసాల వివరాలను ధ్రువీకరించారు. నిబంధనలకు విరుద్ధంగా మద్యం విక్రయాలు జరిపినా, అక్రమ నిల్వలు ఉంచినా బాధ్యులపై చట్ట ప్రకారం చర్యలు తీసుకుంటామని దుకాణాల సిబ్బందికి స్పష్టం చేశారు. ఈ సంయుక్త తనిఖీల్లో ఎన్‌ఫోర్స్‌మెంట్ సీఐ భోగేశ్వరరావు, ఈఎస్ఈఎఫ్ ఎస్ఐ ఎం.డి. ఆరిఫ్, చింతలపూడి ఎక్సైజ్ ఎస్ఐలు అబ్దుల్ ఖలీల్, జె. జగ్గారావు, శిక్షణలో ఉన్న ఎస్ఐ బి. ధనలక్ష్మి, ఇతర సిబ్బంది పాల్గొన్నారు. ఉన్నతాధికారులైన డిప్యూటీ కమిషనర్ బి. శ్రీలత, అసిస్టెంట్ కమిషనర్ కె.వి.ఎన్. ప్రభుకుమార్, జిల్లా ఎక్సైజ్ అధికారి ఏ. ఆవులయ్య ఆదేశాల మేరకు ఈ తనిఖీలు నిర్వహించినట్లు ఎక్సైజ్ సీఐ పి. అశోక్ వెల్లడించారు.