ప్రభుత్వ విద్యార్థుల్లో క్రీడా ప్రతిభను వెలికితీసేందుకు ప్రత్యేక ప్రాధాన్యత

రాష్ట్రంలో స్పోర్ట్స్ యూనివర్సిటీ ఏర్పాటు సీఎం రేవంత్ రెడ్డి ప్రభుత్వ ఘనత

చదువుతోపాటు క్రీడల్లోనూ విద్యార్థులు రాణించాలి: దేవరకొండ ఎమ్మెల్యే నేనావత్ బాలునాయక్

దేవరకొండ: ప్రభుత్వ విద్యాసంస్థల్లో చదువుతున్న విద్యార్థుల్లో దాగి ఉన్న క్రీడా ప్రతిభను వెలికితీసి, వారిని ఉన్నత స్థాయికి తీసుకెళ్లేందుకు ప్రజా ప్రభుత్వం ప్రత్యేక ప్రాధాన్యత ఇస్తోందని దేవరకొండ ఎమ్మెల్యే నేనావత్ బాలునాయక్ అన్నారు. విద్యార్థులు చదువుతోపాటు క్రీడల్లోనూ రాణించి తమ ప్రతిభను నిరూపించుకోవాలని సూచించారు.

దేవరకొండ మండలం గిరిజానగర్ తండా గ్రామపంచాయతీ పరిధిలోని మహాత్మా జ్యోతిబాపూలే తెలంగాణ బీసీ గురుకుల పాఠశాలలో నిర్వహిస్తున్న ఉమ్మడి నల్లగొండ జిల్లా స్థాయి మహాత్మా జ్యోతిబాపూలే బీసీ గురుకులాల 2026-27 క్రీడా పోటీల కార్యక్రమానికి ఎమ్మెల్యే ముఖ్య అతిథిగా హాజరయ్యారు. ఈ సందర్భంగా క్రీడా పోటీలను ప్రారంభించి విద్యార్థులను ఉద్దేశించి మాట్లాడారు.

రాష్ట్రంలోని ప్రభుత్వ విద్యాసంస్థల్లో విద్యార్థులకు నాణ్యమైన విద్య అందించడంతోపాటు క్రీడల్లోనూ ప్రోత్సహించేందుకు ముఖ్యమంత్రి రేవంత్ రెడ్డి నేతృత్వంలోని ప్రజా ప్రభుత్వం ప్రత్యేక శ్రద్ధ చూపుతోందని ఎమ్మెల్యే పేర్కొన్నారు. రాష్ట్రంలో స్పోర్ట్స్ యూనివర్సిటీ ఏర్పాటు చేయడం క్రీడారంగ అభివృద్ధికి ప్రభుత్వం ఇస్తున్న ప్రాధాన్యతకు నిదర్శనమని అన్నారు. ముఖ్యమంత్రి వద్ద విద్యాశాఖ ఉండటంతో ప్రభుత్వ పాఠశాలలు, గురుకుల విద్యాసంస్థల్లో విద్యా ప్రమాణాలను మెరుగుపరిచేందుకు చర్యలు తీసుకుంటున్నారని తెలిపారు. విద్యార్థులకు మెరుగైన విద్యా సదుపాయాలు కల్పించడంతోపాటు వారిలోని ప్రత్యేక ప్రతిభను గుర్తించి ప్రోత్సహించేందుకు ప్రభుత్వం కృషి చేస్తోందని వివరించారు.

క్రీడలు కేవలం శారీరక ఆరోగ్యానికే కాకుండా విద్యార్థుల మానసిక వికాసానికి కూడా దోహదపడతాయని బాలునాయక్ అన్నారు. క్రీడల ద్వారా క్రమశిక్షణ, ఆత్మవిశ్వాసం, పట్టుదల, నాయకత్వ లక్షణాలు పెంపొందుతాయని పేర్కొన్నారు. పోటీల్లో గెలుపోటములను సమానంగా స్వీకరిస్తూ క్రీడాస్ఫూర్తితో ముందుకు సాగాలని విద్యార్థులకు సూచించారు. ప్రతి ఒక్కరూ తమలోని ప్రతిభను గుర్తించి, నిరంతర సాధనతో ఉన్నత లక్ష్యాలను చేరుకోవాలని ఆకాంక్షించారు.

గ్రామీణ ప్రాంతాల్లోని పేద, మధ్యతరగతి కుటుంబాలకు చెందిన విద్యార్థుల్లో అపారమైన క్రీడా ప్రతిభ దాగి ఉందని, వారికి తగిన అవకాశాలు, ప్రోత్సాహం లభిస్తే రాష్ట్ర, జాతీయ, అంతర్జాతీయ స్థాయిలో రాణించే సామర్థ్యం ఉందని ఎమ్మెల్యే అన్నారు. విద్యార్థులు చిన్న వయసు నుంచే క్రీడలపై ఆసక్తి పెంచుకొని, సాధనకు ప్రాధాన్యత ఇవ్వాలని సూచించారు.

ఉమ్మడి నల్లగొండ జిల్లా పరిధిలోని మహాత్మా జ్యోతిబాపూలే బీసీ గురుకులాలకు చెందిన మొత్తం 15 పాఠశాలల నుంచి క్రీడాకారులు ఈ పోటీల్లో పాల్గొంటున్నట్లు తెలిపారు. అండర్-17 విభాగంలో ఒక్కో పాఠశాల నుంచి 35 మంది చొప్పున క్రీడాకారులు హాజరవుతున్నారని వివరించారు. జిల్లా స్థాయి క్రీడా పోటీలను అండర్-14, అండర్-17, అండర్-19 విభాగాల్లో ఈ నెల 11వ తేదీ నుంచి 16వ తేదీ వరకు నిర్వహిస్తున్నట్లు పేర్కొన్నారు.

ఈ పోటీల్లో కబడ్డీ, ఖో-ఖో, వాలీబాల్, హైజంప్, లాంగ్‌జంప్, చెస్ తదితర క్రీడా విభాగాల్లో విద్యార్థులు తమ ప్రతిభను ప్రదర్శించనున్నారు. వివిధ పాఠశాలలకు చెందిన విద్యార్థులు ఒకే వేదికపై పోటీపడటం ద్వారా తమ నైపుణ్యాలను మెరుగుపరుచుకునే అవకాశం లభిస్తుందని ఎమ్మెల్యే అన్నారు. ఇలాంటి పోటీలు విద్యార్థుల్లో పోటీతత్వాన్ని పెంపొందించడంతోపాటు భవిష్యత్తులో ప్రతిభావంతులైన క్రీడాకారులుగా ఎదిగేందుకు ఉపయోగపడతాయని తెలిపారు.

విద్యార్థుల క్రీడా ప్రతిభను గుర్తించి ప్రోత్సహించేలా జిల్లా స్థాయి పోటీలను నిర్వహిస్తున్న గురుకుల విద్యాసంస్థల అధికారులు, ఉపాధ్యాయులను ఎమ్మెల్యే అభినందించారు. పోటీల్లో పాల్గొంటున్న క్రీడాకారులందరూ క్రమశిక్షణతో, పరస్పర గౌరవంతో ఆడాలని సూచించారు. దేవరకొండ నియోజకవర్గానికి, నల్లగొండ జిల్లాకు మంచి పేరు తీసుకురావాలని ఆకాంక్షించారు.

ఈ కార్యక్రమంలో ఆర్డీవో వనజా రాణి, మున్సిపల్ చైర్మన్ పున్న శైలజ వెంకటేశ్వర్లు, లోకసాని శ్రీధర్ రెడ్డి, కొర్ర రాంసింగ్ నాయక్, నేనావత్ బుజ్జి హరిలాల్ నాయక్, మండల సర్పంచులు, కొండూరు పవన్ కుమార్, అంగిరేకుల నాగభూషణం, మాస భాస్కర్, వైఎస్ కరుణాకర్, సంబంధిత శాఖల అధికారులు, గురుకుల పాఠశాలల ఉపాధ్యాయులు, విద్యార్థులు, క్రీడాకారులు, కాంగ్రెస్ పార్టీ నాయకులు తదితరులు పాల్గొన్నారు.