బీజేపీ సేవలో రాష్ట్ర ప్రభుత్వం.. ప్రజాస్వామ్య పరిరక్షణ కోసం పోరాటం ఆపం: షర్మిల
విజయవాడ: ఓటర్ల జాబితాలో అక్రమాలు జరిగాయంటూ కాంగ్రెస్ పార్టీ చేపట్టిన నిరసనల సందర్భంగా పార్టీ నాయకులను ముందస్తుగా అరెస్టు చేయడాన్ని ఏపీసీసీ అధ్యక్షురాలు వైఎస్ షర్మిల ఖండించారు. ప్రజాస్వామ్యబద్ధంగా నిరసన తెలిపే హక్కును అడ్డుకోవడం సరికాదని ఆమె పేర్కొన్నారు. ప్రజాస్వామ్యాన్ని తాము విశ్వసిస్తామని, ఎలాంటి బెదిరింపులకు భయపడకుండా ప్రజా సమస్యలపై పోరాటం కొనసాగిస్తామని స్పష్టం చేశారు.
ఓటర్ల జాబితాలో అవకతవకలపై ప్రశ్నించడం ప్రతిపక్షాల బాధ్యత అని షర్మిల పేర్కొన్నారు. ప్రజల ఓటు హక్కును పరిరక్షించేందుకు కాంగ్రెస్ పార్టీ నిరంతరం కృషి చేస్తుందని తెలిపారు. నిరసన కార్యక్రమాలను అడ్డుకునేందుకు పోలీసు బలాన్ని ఉపయోగించినంత మాత్రాన ప్రజల గొంతును నొక్కలేరని వ్యాఖ్యానించారు. పోలీసు బలం కంటే ప్రజాబలమే గొప్పదని పేర్కొన్నారు.
రాష్ట్ర ప్రభుత్వం ప్రజా సమస్యల పరిష్కారంపై దృష్టి సారించకుండా బీజేపీ సేవలో పనిచేస్తోందని షర్మిల విమర్శించారు. ప్రజాస్వామ్య హక్కులను కాపాడటంతో పాటు ఓటర్ల జాబితాలోని అంశాలపై పారదర్శకత ఉండాలని డిమాండ్ చేశారు. ముందస్తు అరెస్టులతో తమ ఉద్యమాన్ని నిలువరించలేరని, ప్రజాస్వామ్య పరిరక్షణ కోసం కాంగ్రెస్ పార్టీ తన పోరాటాన్ని కొనసాగిస్తుందని స్పష్టం చేశారు.
