వేస్ట్ టు ఆర్ట్ లో విద్యార్థుల సృజనాత్మకతకు ప్రశంసలు

వరంగల్: స్వచ్ఛత హి సేవా–2026 కార్యక్రమంలో భాగంగా గ్రేటర్ వరంగల్ మున్సిపల్ కార్పొరేషన్ (GWMC) ప్రధాన కార్యాలయంలో నిర్వహించిన ‘వేస్ట్ టు ఆర్ట్’ ప్రదర్శన ఆకట్టుకుంది. వివిధ పాఠశాలలకు చెందిన విద్యార్థులు వ్యర్థ పదార్థాలను పునర్వినియోగించి రూపొందించిన సృజనాత్మక కళాకృతులను ప్రదర్శించారు.

ఈ ప్రదర్శనను GWMC కమిషనర్ టి. వెంకన్న పరిశీలించి విద్యార్థుల ప్రతిభను అభినందించారు. వ్యర్థ పదార్థాల పునర్వినియోగం, రీసైక్లింగ్‌పై విద్యార్థుల్లో అవగాహన పెంపొందించడం అభినందనీయమన్నారు.

స్వచ్ఛత, పర్యావరణ పరిరక్షణపై ప్రజల్లో అవగాహన పెంచడంతో పాటు స్వచ్ఛ, పచ్చని వరంగల్ నిర్మాణంలో విద్యార్థులు భాగస్వాములు కావాలని కమిషనర్ సూచించారు.

ప్రదర్శనలో పాల్గొన్న విద్యార్థులు, ఉపాధ్యాయులకు ప్రశంసా పత్రాలను అందజేశారు. కార్యక్రమంలో విద్యార్థులు రూపొందించిన వివిధ కళాకృతులను అధికారులు పరిశీలించారు.