తిరువూరులో ఎరువుల దుకాణాలపై ఆకస్మిక తనిఖీలు

తిరువూరు: పట్టణంలోని ఎరువుల దుకాణాలను వ్యవసాయ సహాయ సంచాలకులు ఎం. శ్రీనివాసరావు మంగళవారం ఆకస్మికంగా తనిఖీ చేశారు. ఈ సందర్భంగా ఎరువుల విక్రయాలు, నిల్వలకు సంబంధించిన రికార్డులను అధికారులు క్షుణ్ణంగా పరిశీలించారు.

ఎరువుల స్టాక్ రిజిస్టర్లు, 13 స్టాక్ రిజిస్టర్లు, స్టాక్ బోర్డులు, సోర్స్ సర్టిఫికెట్లను తనిఖీ చేశారు. అలాగే బయో స్టిములెంట్స్‌కు సంబంధించిన నిల్వలు, వాటి సోర్స్ సర్టిఫికెట్లను పరిశీలించారు. దుకాణాల్లో ఉన్న ఎరువుల నిల్వలు, రికార్డుల్లో నమోదైన వివరాలతో సరిపోతున్నాయా లేదా అనే అంశాలను కూడా పరిశీలించారు.

ఈ సందర్భంగా ఎరువుల డీలర్లకు అధికారులు పలు సూచనలు చేశారు. ఎరువులు విక్రయించే ప్రతి డీలర్ తాము విక్రయించే ఎరువులకు సంబంధించిన సోర్స్ సర్టిఫికెట్లను తప్పనిసరిగా తమ ఎరువుల లైసెన్సులో చేర్చుకోవాలని సూచించారు. సరైన సోర్స్ సర్టిఫికెట్, ఇన్వాయిస్ లేకుండా ఎరువుల విక్రయాలు నిర్వహించడం నిబంధనలకు విరుద్ధమని స్పష్టం చేశారు.

తనిఖీల్లో సోర్స్ సర్టిఫికెట్, ఇన్వాయిస్ లేకుండా ఎరువుల విక్రయాలు జరుగుతున్నట్లు గుర్తిస్తే సంబంధిత డీలర్లపై చట్ట ప్రకారం కఠిన చర్యలు తీసుకుంటామని అధికారులు హెచ్చరించారు. అవసరమైతే సంబంధిత ఎరువుల విక్రయాలపై స్టాప్ సేల్ ఉత్తర్వులు జారీ చేస్తామని తెలిపారు.ఈ తనిఖీల్లో ఏవో పద్మ పాల్గొన్నారు.