తెలంగాణ లో కాంట్రాక్ట్, అవుట్‌సోర్సింగ్ ఉద్యోగులకు గుడ్‌న్యూస్.. ఇవాళ అకౌంట్లలోకి జీతాలు

తెలంగాణ ఆరోగ్య శాఖ పరిధిలో పనిచేస్తున్న కాంట్రాక్ట్, అవుట్‌సోర్సింగ్ ఉద్యోగులకు రాష్ట్ర ప్రభుత్వం శుభవార్త తెలిపింది. ఇకపై ప్రతి నెల 1వ తేదీననే డైరెక్ట్ బెనిఫిట్ ట్రాన్స్‌ఫర్ (డీబీటీ) విధానంలో ఉద్యోగుల బ్యాంకు ఖాతాల్లో వేతనాలు జమ చేయాలని నిర్ణయించింది.

ఈ మేరకు ఇప్పటికే పలువురు ఉద్యోగుల ఖాతాల్లో ఈ నెల జీతాలు జమయ్యాయి. అయితే తెలంగాణ వైద్య విధాన పరిషత్ (టీవీవీపీ) పరిధిలో పనిచేస్తున్న సుమారు 1,700 మంది ఉద్యోగులకు సాంకేతిక కారణాల వల్ల జీతాల జమలో ఆలస్యం చోటుచేసుకుంది.

అయితే ఆయా ఉద్యోగుల ఖాతాల్లో సోమవారం జీతాలు జమ కానున్నాయని అధికారులు తెలిపారు. ఇందుకు సంబంధించిన అన్ని ఏర్పాట్లను టీవీవీపీ అధికారులు పూర్తి చేసినట్లు వెల్లడించారు.