తెలంగాణ నిరుద్యోగులకు గుడ్‌న్యూస్.. 5 వేల పోలీసు ఉద్యోగాలకు గ్రీన్ సిగ్నల్
హైదరాబాద్, జూలై 4: తెలంగాణలో పోలీసు ఉద్యోగాల కోసం ఎదురుచూస్తున్న నిరుద్యోగ యువతకు రాష్ట్ర ప్రభుత్వం శుభవార్త చెప్పింది. పోలీసుశాఖలో 5 వేల పోస్టుల భర్తీకి ప్రభుత్వం ఆమోదం తెలిపింది. ఇందుకు సంబంధించిన అనుమతులను రాష్ట్ర ఆర్థికశాఖ మంజూరు చేసింది.
భర్తీ చేయనున్న పోస్టుల్లో అత్యధికంగా కానిస్టేబుల్ (సివిల్) విభాగంలో 3,697 పోస్టులు, కానిస్టేబుల్ (ఏఆర్)లో 1,052 పోస్టులు ఉన్నాయి. అలాగే ఎస్‌ఐ (సివిల్) 148, ఎస్‌ఐ (ఆర్మ్డ్ రిజర్వ్) 14, ఆర్‌ఎస్‌ఐ (టీజీఎస్‌పీఎస్సీ) 12, ఎస్‌ఐ (ఏఆర్ సివిల్) 3, ఏఎస్‌ఐ (ఎఫ్‌పీబీ) 23, కానిస్టేబుల్ (ఎస్‌ఏఆర్ సీపీఎల్) 24, కానిస్టేబుల్ (డ్రైవర్-పీటీవో) 20, మెకానిక్ పీటీవో 7 పోస్టులను భర్తీ చేయనున్నారు.
ఈ నియామకాల ప్రక్రియను నిర్వహించేందుకు త్వరలోనే తెలంగాణ రాష్ట్ర పోలీసు నియామక మండలి (టీఎస్‌పీఎల్‌ఆర్‌బీ) నోటిఫికేషన్ విడుదల చేయనుంది. దీంతో పోలీసు ఉద్యోగాల కోసం సిద్ధమవుతున్న వేలాది మంది నిరుద్యోగుల్లో కొత్త ఆశలు చిగురించాయి.
