తెలంగాణలో ఫ్యామిలీ రిజిస్టర్ సర్టిఫికెట్‌.. ప్రభుత్వం కీలక నిర్ణయం

హైదరాబాద్, జులై 28: తెలంగాణలో ప్రతి కుటుంబానికి అధికారిక కుటుంబ వివరాలను ఒకే చోట అందుబాటులో ఉంచేందుకు రాష్ట్ర ప్రభుత్వం ఫ్యామిలీ రిజిస్టర్ రూపొందించాలని నిర్ణయించింది. రేషన్ కార్డుల డేటా ఆధారంగా ఈ రిజిస్టర్‌ను సిద్ధం చేయనుంది. అలాగే ప్రతి కుటుంబానికి ఫ్యామిలీ రిజిస్టర్ సర్టిఫికెట్ జారీ చేయాలని నిర్ణయించింది.

ఈ సర్టిఫికెట్లను మీసేవ కేంద్రాల ద్వారా అందుబాటులోకి తీసుకురానున్నారు. వివిధ ప్రభుత్వ సంక్షేమ పథకాలకు దరఖాస్తు చేసుకునే సమయంలో ప్రజలు ఎదుర్కొనే ఇబ్బందులను తగ్గించడం ఈ నిర్ణయం ప్రధాన ఉద్దేశమని ప్రభుత్వం తెలిపింది.

సమాజంలోని ప్రతి కుటుంబానికి సంబంధించిన అధికారిక వివరాలను ఒకే పత్రంలో నమోదు చేసి, అవసరమైన సందర్భాల్లో సులభంగా వినియోగించుకునే విధంగా ఈ ఫ్యామిలీ రిజిస్టర్ సర్టిఫికెట్ ఉపయోగపడుతుందని ప్రభుత్వం వెల్లడించింది.