చుక్కల దుప్పిని వేటాడిన ముగ్గురి అరెస్ట్ – 14 రోజుల రిమాండ్
మార్కాపురం జిల్లా గిద్దలూరు డివిజన్ పరిధిలోని గుండ్లకమ్మ రేంజ్, రాచెర్ల సెక్షన్, అంబవరం బీట్లోని ENB-I రిజర్వ్ ఫారెస్ట్లో చుక్కల దుప్పిని ఉచ్చులు బిగించి వేటాడిన కేసులో ముగ్గురు వ్యక్తులను అటవీశాఖ అధికారులు అరెస్ట్ చేశారు.
అటవీశాఖ అధికారులు తెలిపిన వివరాల ప్రకారం.. గోగుల శ్రీను, భూపాని శ్రీ వెంకట లక్ష్మీ నారాయణ, గుర్రం పెద్ద గురవయ్యలను అదుపులోకి తీసుకుని కేసు నమోదు చేశారు. అనంతరం నిందితులను గిద్దలూరు మేజిస్ట్రేట్ ఎదుట హాజరుపరచగా 14 రోజుల రిమాండ్ విధించారు. దీంతో వారిని ప్రకాశం జిల్లా ఒంగోలు డిస్ట్రిక్ట్ జైలుకు తరలించారు.
చుక్కల దుప్పి వన్యప్రాణుల రక్షణ చట్టం పరిధిలో రక్షిత వన్యప్రాణిగా ఉందని అటవీశాఖ అధికారులు తెలిపారు. చుక్కల దుప్పిని వేటాడటం, హతమార్చడం చట్టరీత్యా తీవ్రమైన నేరమని పేర్కొన్నారు. అటవీ ప్రాంతాల్లో అక్రమంగా వేటకు పాల్పడే వారిపై కఠినమైన చట్టపరమైన చర్యలు తీసుకుంటామని అధికారులు హెచ్చరించారు. వన్యప్రాణుల సంరక్షణకు ప్రజలు సహకరించాలని కోరారు.
