తిరువూరులో కుండపోత.. జలమయమైన లోతట్టు ప్రాంతాలు

తిరువూరు: తుఫాన్ ప్రభావంతో తిరువూరు పట్టణంలో బుధవారం కుండపోత వర్షం కురిసింది. ఒక్కసారిగా భారీ వర్షం పడటంతో పట్టణంలోని లోతట్టు ప్రాంతాలు జలమయంగా మారాయి. ప్రధాన రహదారులపైకి పెద్దఎత్తున వర్షపు నీరు చేరడంతో రాకపోకలకు తీవ్ర అంతరాయం ఏర్పడింది.

పట్టణంలోని ప్రధాన రహదారులు వరద నీటితో పొంగిపొర్లడంతో వాహనదారులు, పాదచారులు తీవ్ర ఇబ్బందులు ఎదుర్కొన్నారు. ద్విచక్ర వాహనదారులు నీటిలో ప్రయాణించేందుకు అవస్థలు పడగా, పాదచారులు రహదారులు దాటేందుకు ఇబ్బందులు ఎదుర్కొన్నారు. పలు ప్రాంతాల్లో డ్రైనేజీ వ్యవస్థపై వర్షపు నీటి ప్రవాహం ఒత్తిడి పెరగడంతో రోడ్లపై నీరు నిలిచిపోయింది.

తిరువూరు బస్టాండ్ ప్రాంతానికి కూడా భారీగా వరద నీరు చేరింది. దీంతో బస్టాండ్‌కు వచ్చే ప్రయాణికులు వర్షపు నీటిలోనే నడుచుకుంటూ వెళ్లాల్సిన పరిస్థితి ఏర్పడింది. భారీ వర్షంతో రహదారులపై నీరు నిలిచిపోవడంతో వాహనాల రాకపోకలు మందగించాయి. తుఫాన్ ప్రభావం కొనసాగుతున్న నేపథ్యంలో ప్రజలు అప్రమత్తంగా ఉండాలని అధికారులు సూచిస్తున్నారు.