కొత్తపేటలో కౌంటింగ్ నేపథ్యంలో ట్రాఫిక్ మళ్లింపు

ఉదయం 7 నుంచి రాత్రి 9 గంటల వరకు ఆంక్షలు.. కౌంటింగ్ కేంద్రాలను పరిశీలించిన జిల్లా ఎస్పీ

కొత్తపేట (ఎన్ టుడే న్యూస్):

డాక్టర్ బి.ఆర్. అంబేద్కర్ కోనసీమ జిల్లా కొత్తపేటలో నవంబర్ 7న నిర్వహించనున్న ఎంపీటీసీ, జడ్పీటీసీ ఎన్నికల ఓట్ల లెక్కింపు నేపథ్యంలో పోలీసులు ట్రాఫిక్ మళ్లింపు చర్యలు చేపట్టారు. కౌంటింగ్ ప్రక్రియ ప్రశాంతంగా, సజావుగా నిర్వహించడంతో పాటు వాహనదారులకు ఇబ్బందులు కలగకుండా ముందస్తు ఏర్పాట్లు చేశారు.

జిల్లా ఎస్పీ రాహుల్ మీనా, ఐపీఎస్ ఆదేశాల మేరకు కొత్తపేట డీఎస్పీ సుంకర మురళీమోహన్ పర్యవేక్షణలో రావులపాలెం రూరల్ సీఐ సి.హెచ్. విద్యాసాగర్, కొత్తపేట ఎస్సై జి. సురేంద్ర ట్రాఫిక్ నియంత్రణకు ప్రత్యేక ఏర్పాట్లు చేశారు. నవంబర్ 7న ఉదయం 7 గంటల నుంచి రాత్రి 9 గంటల వరకు ట్రాఫిక్ ఆంక్షలు అమలులో ఉంటాయని పోలీసులు తెలిపారు.

వాహనాల మళ్లింపు మార్గాలు ఇవే..

రావులపాలెం నుంచి అమలాపురం వెళ్లే వాహనాలు బోడిపాలెం బ్రిడ్జి, వాడపాలెం, అడ్డకాలువ, వానపల్లి, ముక్తేశ్వరం మీదుగా ప్రయాణించాలని పోలీసులు సూచించారు.

అదేవిధంగా అమలాపురం నుంచి రావులపాలెం వెళ్లే వాహనాలు పలివెల వంతెన, పలివెల గ్రామం, గంటి చెక్‌పోస్టు, ఈతకోట మీదుగా వెళ్లాలని తెలిపారు.

వాహనదారులు తమ ప్రయాణాలను ముందుగానే ప్రణాళిక చేసుకుని, సూచించిన ప్రత్యామ్నాయ మార్గాలను వినియోగించుకోవాలని కొత్తపేట ఎస్సై జి. సురేంద్ర కోరారు. ట్రాఫిక్ విధుల్లో ఉన్న పోలీసులకు సహకరించాలని విజ్ఞప్తి చేశారు.

కౌంటింగ్ కేంద్రాలను పరిశీలించిన ఎస్పీ

మరోవైపు ఎంపీటీసీ, జడ్పీటీసీ ఎన్నికల ఓట్ల లెక్కింపు కోసం ఏర్పాటు చేసిన వి.కె.వి. ప్రభుత్వ డిగ్రీ కళాశాల, ప్రభుత్వ బాలుర ఉన్నత పాఠశాల కౌంటింగ్ కేంద్రాలను జిల్లా ఎస్పీ రాహుల్ మీనా శుక్రవారం పరిశీలించారు. కేంద్రాల్లోని స్ట్రాంగ్ రూములను తనిఖీ చేసి, భద్రతా ఏర్పాట్లపై స్థానిక పోలీసు అధికారులకు పలు సూచనలు చేశారు.

కౌంటింగ్ సమయంలో ఎలాంటి అవాంఛనీయ సంఘటనలు చోటుచేసుకోకుండా అప్రమత్తంగా ఉండాలని, భద్రతా విధులను సమర్థంగా నిర్వహించాలని అధికారులకు సూచించినట్లు సమాచారం.

ఈ పరిశీలనలో కొత్తపేట డీఎస్పీ సుంకర మురళీమోహన్, స్పెషల్ బ్రాంచ్ సీఐ పుల్లారావు, రావులపాలెం రూరల్ సీఐ సి.హెచ్. విద్యాసాగర్, ఎస్సై జి. సురేంద్ర తదితరులు పాల్గొన్నారు.