మంత్రి నారా లోకేశ్ పనితీరుపై ఉపాసన కొణిదెల ప్రశంసల

 జల్లు ‘రాక్స్టార్ మంత్రి’ అంటూ అభివర్ణన..

యువతకు నిజమైన ప్రతినిధి అని కొనియాడిన అపోలో ఫౌండేషన్ వైస్ చైర్‌పర్సన్ మంత్రి నారా లోకేశ్ పనితీరుపై అపోలో ఫౌండేషన్ వైస్ చైర్‌పర్సన్ ఉపాసన కొణిదెల ప్రశంసలు కురిపించారు. రాష్ట్ర అభివృద్ధి, పెట్టుబడుల ఆకర్షణలో లోకేశ్ చూపిస్తున్న చొరవ, వేగం, కార్యదక్షత అభినందనీయమని కొనియాడారు. ఆయనను ‘రాక్స్టార్ మంత్రి’గా అభివర్ణిస్తూ, నేటి యువతకు నిజమైన ప్రతినిధిగా నిలుస్తున్నారని ప్రశంసించారు. రాష్ట్రంతో పాటు దేశ ప్రగతికి నారా లోకేశ్ అందిస్తున్న సేవలు ఎంతో కీలకమని ఉపాసన అభిప్రాయపడ్డారు. ఆయనలో కనిపించే ఉత్సాహం, చురుకుదనం, పనుల పట్ల నిబద్ధత రాష్ట్రవ్యాప్తంగా సాగుతున్న అభివృద్ధి కార్యక్రమాల్లో స్పష్టంగా ప్రతిబింబిస్తున్నాయని పేర్కొన్నారు. ముఖ్యంగా రాష్ట్రానికి భారీ స్థాయిలో పెట్టుబడులను తీసుకురావడంలో ఆయన చూపిస్తున్న ప్రత్యేక చొరవను ఆమె ప్రశంసించారు. కేవలం 16 నెలల స్వల్ప వ్యవధిలోనే ఆంధ్రప్రదేశ్‌కు 120 బిలియన్ డాలర్ల పెట్టుబడులను ఆకర్షించడం సాధారణ విషయం కాదని, ఇది రాష్ట్రానికి గొప్ప విజయమని ఉపాసన కొనియాడారు. ఈ స్థాయిలో పెట్టుబడులు రావడం రాష్ట్ర పారిశ్రామిక రంగానికి కొత్త ఊపునివ్వడంతో పాటు ఆర్థిక వ్యవస్థను మరింత బలోపేతం చేస్తుందని ఆశాభావం వ్యక్తం చేశారు. భారీ పెట్టుబడుల ద్వారా పరిశ్రమల స్థాపనకు మార్గం సుగమం కావడమే కాకుండా, రాష్ట్రంలోని యువతకు పెద్ద ఎత్తున ఉద్యోగ, ఉపాధి అవకాశాలు అందుబాటులోకి వస్తాయని పేర్కొన్నారు. అభివృద్ధి లక్ష్యంగా వేగంగా ముందుకు సాగుతున్న నారా లోకేశ్ నాయకత్వం, పనితీరు యువతలో కొత్త ఆశలు రేకెత్తిస్తోందని ఉపాసన ప్రశంసించారు.