పెనుగొలనులో వడ్డే ఓబన్న వర్ధంతి కార్యక్రమం

పెనుగొలనులో వడ్డే ఓబన్న వర్ధంతి పెనుగొలనులో వడ్డే ఓబన్నకు ఘన నివాళి

గంపలగూడెం: ఎన్టీఆర్ జిల్లా తిరువూరు నియోజకవర్గం గంపలగూడెం మండలం పెనుగొలను గ్రామంలో వడ్డెర సంఘం ఆధ్వర్యంలో మంగళవారం రాత్రి స్వాతంత్య్ర సమరయోధుడు వడ్డే ఓబన్న వర్ధంతి ఘనంగా నిర్వహించారు. ఈ సందర్భంగా ఆయన చిత్రపటానికి పూలమాలలు వేసి ఘనంగా నివాళులర్పించారు. అనంతరం మిఠాయిలు పంపిణీ చేశారు.

ఈ సందర్భంగా జరిగిన సభలో వక్తలు మాట్లాడుతూ వడ్డే ఓబన్న బ్రిటిష్ ఈస్ట్ ఇండియా కంపెనీ దోపిడీకి వ్యతిరేకంగా పోరాడిన ధైర్యసాహసాల వీరుడని కొనియాడారు. 1807 జనవరి 11న నంద్యాల జిల్లా నోస్సం గ్రామంలో వడ్డెర కుటుంబంలో జన్మించిన ఓబన్న, స్వాతంత్య్ర పోరాట యోధుడు ఉయ్యాలవాడ నరసింహారెడ్డికి అండగా నిలిచి బ్రిటిష్ పాలనకు వ్యతిరేకంగా పోరాటం సాగించారని తెలిపారు.

వడ్డెర, బోయ, చెంచు, యానాది తదితర వర్గాలకు చెందిన సుమారు 2 వేల మందితో గెరిల్లా దళాన్ని ఏర్పాటు చేసి బ్రిటిష్ ఈస్ట్ ఇండియా కంపెనీకి వ్యతిరేకంగా పోరాడినట్లు వక్తలు వివరించారు. బ్రిటిష్ ఖజానాలను లక్ష్యంగా చేసుకోవడం, దోపిడీకి పాల్పడిన అధికారులను ఎదుర్కోవడం వంటి చర్యలతో బ్రిటిష్ పాలకులను ఎదుర్కొన్న ధైర్యశాలి వడ్డే ఓబన్న అని పేర్కొన్నారు.

1846 అక్టోబర్ 6న కర్నూలు జిల్లాలోని పేరు సోముల కొండ వద్ద బ్రిటిష్ సైన్యంతో జరిగిన పోరులో వీరోచితంగా పోరాడుతూ వడ్డే ఓబన్న వీరమరణం పొందారని గుర్తుచేశారు. ఆయన త్యాగం, ధైర్యసాహసాలు నేటి తరానికి స్ఫూర్తిదాయకమని అన్నారు.

కార్యక్రమంలో సాయి బాబా సేవా కమిటీ అధ్యక్షుడు వూటుకూరు నారాయణరావు, వడ్డెర సంఘం నాయకులు కుంచం వెంకటేశ్వర్లు, బూసి ఏడుకొండలు, కుంచం రామకృష్ణ, కుంచం గోపాలకృష్ణ, కుంచం కృష్ణ, కుంచం బ్రహ్మం, బై ముతక గోపి, తమ్మిశెట్టి చుక్కయ్య తదితరులు పాల్గొన్నారు.