విస్సన్నపేటకు రాజకీయ జాక్పాట్..!
విస్సన్నపేటకు రాజకీయ జాక్పాట్..! నియోజకవర్గం ఖాయం దిశగా వేగం
చాట్రాయి, మార్చి 28: ఆంధ్రప్రదేశ్ రాజకీయాల్లో భారీ మార్పులకు దారి తీసే నియోజకవర్గాల పునర్విభజన ప్రక్రియ వేగం అందుకుంటున్న వేళ ఎన్టీఆర్ జిల్లా రాజకీయాల్లో విస్సన్నపేట హాట్టాపిక్గా మారింది. 2011 జనాభా లెక్కల ఆధారంగా పునర్విభజన చేపట్టాలని కేంద్రం సంకేతాలు ఇవ్వడంతో రాష్ట్రంలో అసెంబ్లీ స్థానాలు 175 నుంచి 263కు పెరిగే అవకాశాలు కనిపిస్తున్నాయి. ఈ క్రమంలోనే కొత్తగా విస్సన్నపేట అసెంబ్లీ నియోజకవర్గం రూపుదిద్దుకునే అవకాశాలు బలంగా వినిపిస్తున్నాయి.
ప్రస్తుతం తిరువూరు, నూజివీడు, మైలవరం నియోజకవర్గాల మధ్య విభజించబడిన విస్సన్నపేట, చాట్రాయి, రెడ్డిగూడెం మండలాలను ఒకే నియోజకవర్గంగా కలపాలని ఉన్నతస్థాయి రాజకీయ చర్చలు జరుగుతున్నట్లు సమాచారం. ఇది అమలైతే భౌగోళికంగా, సామాజికంగా బలమైన నియోజకవర్గంగా విస్సన్నపేట ఎదిగే అవకాశం ఉందని విశ్లేషకులు అంటున్నారు.
ఓసి కోటాలో కీలక పోరు..!
2011 జనాభా లెక్కల ప్రకారం ఈ ప్రాంతంలో ఓసి వర్గ ఓటర్లు అధికంగా ఉండటంతో కొత్త నియోజకవర్గం సాధారణ కేటగిరీగా ఉండే అవకాశాలు కనిపిస్తున్నాయి. దీంతో కమ్మ, రెడ్డి వర్గాలకు చెందిన బలమైన నాయకులు ఇప్పటికే గణాంకాలు లెక్కించుకుంటూ, తమ తమ రాజకీయ వ్యూహాలు సిద్ధం చేసుకుంటున్నారు.
టీడీపీ – వైసీపీ లోపలి పోటీలు ప్రారంభం
నియోజకవర్గం అధికారిక ప్రకటన రాకముందే ప్రధాన పార్టీలైన టీడీపీ, వైసీపీ లోపలే టికెట్ కోసం మల్లగుల్లాలు మొదలయ్యాయి. స్థానికంగా ప్రభావం ఉన్న నేతలు గుప్త సమావేశాలు నిర్వహిస్తూ, గ్రౌండ్ లెవెల్లో తమ బలాన్ని పెంచుకునే పనిలో నిమగ్నమయ్యారు. గ్రామస్థాయిలో నాయకులు ఇప్పటికే "మనవాడే ఎమ్మెల్యే" అంటూ ప్రచారం మొదలు పెట్టడం గమనార్హం.
చాట్రాయి రాజకీయంగా కీలక కేంద్రమా..?
చాట్రాయి మండలం ఈ కొత్త సమీకరణలో కీలక పాత్ర పోషించే అవకాశం ఉంది. ఇక్కడి ఓటర్ల తీరు, సామాజిక సమీకరణలు ఎన్నికల ఫలితాలను ప్రభావితం చేసే స్థాయిలో ఉంటాయని రాజకీయ విశ్లేషకులు అంచనా వేస్తున్నారు. అదే విధంగా రెడ్డిగూడెం మండలం కూడా కీలక ఓటు బ్యాంక్గా మారనుంది.
ఆశల పల్లకిలో స్థానిక నేతలు
ఇప్పటికే పలు ఆశావహులు తమ తమ క్యాంపులను సిద్ధం చేసుకుంటూ, పార్టీ అధిష్టానాలకు చేరువయ్యే ప్రయత్నాలు చేస్తున్నారు. కొందరు నేతలు అయితే అభివృద్ధి కార్యక్రమాల పేరుతో ప్రజల్లోకి వెళ్లి ఇమేజ్ బిల్డింగ్ ప్రారంభించారు. మరోవైపు యువ నాయకులు సోషల్ మీడియాను ఆయుధంగా మార్చుకుని ముందుకెళ్తున్నారు.
రాజకీయ సమీకరణలు మారే ఛాన్స్..!
ఈ నియోజకవర్గం ఏర్పడితే ప్రస్తుతం ఉన్న తిరువూరు, నూజివీడు, మైలవరం రాజకీయ సమీకరణాలు పూర్తిగా మారే అవకాశం ఉంది. పాత సమీకరణలు కూలిపోగా, కొత్త కూటములు, కొత్త నాయకత్వం వెలుగులోకి వచ్చే అవకాశం ఉందని అంచనాలు వ్యక్తమవుతున్నాయి.
మొత్తానికి, విస్సన్నపేట నియోజకవర్గం ఏర్పాటు కేవలం పరిపాలనా మార్పు మాత్రమే కాకుండా, ప్రాంతీయ రాజకీయాల్లో కొత్త అధ్యాయానికి నాంది పలికే పరిణామంగా మారబోతోందని స్పష్టమవుతోంది. ఇప్పుడు అందరి చూపు ఒక్కటే—“విస్సన్నపేట ఎమ్మెల్యే సీటు ఎవరికి దక్కుతుంది?”
సమాధానం కోసం రాజకీయ వర్గాలు ఉత్కంఠగా ఎదురుచూస్తున్నాయి.
