విస్సన్నపేటలో సామూహిక ఎలుకల నివారణ కార్యక్రమం

ఎన్టీఆర్ జిల్లా తిరువూరు నియోజకవర్గం విస్సన్నపేట మండలంలోని అన్ని గ్రామాల్లో రైతు సేవా కేంద్రాల వద్ద మంగళవారం సామూహిక ఎలుకల నివారణ కార్యక్రమాన్ని నిర్వహించినట్లు మండల వ్యవసాయాధికారి జి. రాజ్యలక్ష్మి తెలిపారు.

మండలంలోని విస్సన్నపేట, చండ్రుపట్ల గ్రామాల్లో వ్యవసాయ విస్తరణ అధికారులు పాల్గొని రైతులకు ఎలుకల నివారణకు తీసుకోవాల్సిన జాగ్రత్తలు, పాటించాల్సిన పద్ధతులపై అవగాహన కల్పించారు. 96 గ్రాముల నూకలకు 2 గ్రాముల వేరుశనగ నూనె, 2 గ్రాముల బ్రోమోడయాలిన్ మందును కలిపి, 10 గ్రాముల చొప్పున పొట్లాలుగా తయారు చేసి ఎలుకల బొరియల్లో ఉంచాలని సూచించారు. ఒకే ప్రాంతంలోని రైతులందరూ ఒకేరోజు సామూహికంగా ఎలుకల నివారణ చర్యలు చేపట్టినప్పుడే మెరుగైన ఫలితాలు సాధించవచ్చని అధికారులు తెలిపారు.

బ్రోమోడయాలిన్ మందు అవసరమైన రైతులు సంబంధిత రైతు సేవా కేంద్రం సిబ్బందిని సంప్రదించి 100 శాతం రాయితీపై ఉచితంగా పొందాలని మండల వ్యవసాయాధికారి జి. రాజ్యలక్ష్మి సూచించారు. అనంతరం బ్రోమోడయాలిన్ మిశ్రమాన్ని తయారు చేసే విధానాన్ని రైతులకు ప్రదర్శన ద్వారా వివరించారు.

ఈ కార్యక్రమంలో వ్యవసాయ విస్తరణ అధికారి ఉషారాణి, గ్రామ సచివాలయ సిబ్బంది, రైతులు పాల్గొన్నారు.