నెమలి శ్రీ వేణుగోపాలస్వామి ఆలయంలో ఘనంగా వరుణ యాగం

ఎన్టీఆర్ జిల్లా గంపలగూడెం మండలం: రాష్ట్రంలో సమృద్ధిగా వర్షాలు కురవాలని, ఎల్‌నినో ప్రభావం నుంచి రాష్ట్రాన్ని కాపాడాలని కాంక్షిస్తూ నెమలి గ్రామంలోని శ్రీ వేణుగోపాలస్వామి ఆలయంలో వరుణ యాగాన్ని శాస్త్రోక్తంగా నిర్వహించారు. తిరువూరు ఎమ్మెల్యే కొలికపూడి శ్రీనివాసరావు ఆధ్వర్యంలో నిర్వహించిన ఈ యాగంలో వేద పండితులు, అర్చకులు పాల్గొన్నారు.

సకాలంలో విస్తారంగా వర్షాలు కురిసి రాష్ట్ర ప్రజలు సుభిక్షంగా ఉండాలని, పాడిపంటలు సమృద్ధిగా పండాలని ఆకాంక్షిస్తూ ప్రత్యేక పూజలు, జపాలు నిర్వహించారు. హోమగుండం వద్ద వేద పండితులు శాస్త్రోక్త విధానాలతో యాగ క్రతువును పూర్తి చేశారు.

వర్షాల కోసం ప్రాచీన కాలం నుంచే వరుణ యాగాలు నిర్వహించే ఆధ్యాత్మిక సంప్రదాయం ఉందనే నేపథ్యంతో, ముఖ్యమంత్రి ఆదేశాల మేరకు ఈ కార్యక్రమాన్ని నిర్వహించినట్లు నిర్వాహకులు తెలిపారు. రాష్ట్ర ప్రజలకు సమృద్ధి, సకాలంలో వర్షాలు, పంటలకు అనుకూల వాతావరణం కలగాలని ఈ సందర్భంగా ప్రత్యేక ప్రార్థనలు చేశారు.