నెమలిలో వైభవంగా రుక్మిణి సమేత వేణుగోపాల స్వామి కల్యాణం

ఎన్టీఆర్ జిల్లా తిరువూరు నియోజకవర్గం గంపలగూడెం మండలం నెమలి గ్రామంలో కొలువై ఉన్న శ్రీ రుక్మిణి సమేత వేణుగోపాల స్వామి దేవస్థానంలో పౌర్ణమి సందర్భంగా శనివారం స్వామివారి కల్యాణ మహోత్సవాన్ని వైభవంగా నిర్వహించారు. ఆలయ అర్చకులు గోపాలాచార్యుల ఆధ్వర్యంలో ముందుగా రుక్మిణీదేవి సమేత వేణుగోపాల స్వామివారికి ప్రత్యేక పూజలు నిర్వహించారు. అనంతరం వేదమంత్రాల నడుమ కల్యాణ మహోత్సవాన్ని శాస్త్రోక్తంగా నిర్వహించారు.

కల్యాణ వేడుకలను తిలకించేందుకు నెమలి గ్రామంతో పాటు పరిసర గ్రామాల నుంచి భక్తులు పెద్ద సంఖ్యలో ఆలయానికి తరలివచ్చారు. స్వామివారి కల్యాణాన్ని భక్తిశ్రద్ధలతో వీక్షించిన భక్తులు ప్రత్యేక పూజలు నిర్వహించి మొక్కులు చెల్లించుకున్నారు. కల్యాణ మహోత్సవం అనంతరం భక్తులకు తీర్థప్రసాదాలను పంపిణీ చేశారు.

ఈ కార్యక్రమంలో ఆలయ అధికారులు, ఆలయ సిబ్బంది, వివిధ గ్రామాలకు చెందిన భక్తులు తదితరులు పాల్గొన్నారు. ఆలయ ప్రాంగణం భక్తులతో కిటకిటలాడగా, పౌర్ణమి సందర్భంగా నిర్వహించిన స్వామివారి కల్యాణ మహోత్సవంతో నెమలి గ్రామంలో ఆధ్యాత్మిక వాతావరణం నెలకొంది.