బైక్‌కు కారు నంబర్ ప్లేట్.. అనుమానంతో ఇద్దరిని పట్టుకున్న గ్రామస్తులు!

పిట్టంపల్లిలో యువకుల అప్రమత్తత.. పోలీసులకు సమాచారం

ఎన్ టుడే న్యూస్ చిట్యాల 

నల్లగొండ జిల్లా చిట్యాల మండలం పిట్టంపల్లి గ్రామంలో అనుమానాస్పదంగా బైక్‌పై సంచరిస్తున్న ఇద్దరు గుర్తుతెలియని వ్యక్తులను గ్రామస్తులు, యువకులు వెంబడించి పట్టుకున్నారు. వారు ప్రయాణిస్తున్న బైక్‌కు కారు రిజిస్ట్రేషన్ నంబర్‌ను అమర్చినట్లు సమాచారం తెలుసుకున్న యువకులు అప్రమత్తమై వారిని వెంబడించారు.

అనంతరం వారిని పట్టుకుని గ్రామస్తులు ప్రశ్నించగా పొంతనలేని సమాధానాలు చెప్పడంతో అనుమానాలు వ్యక్తం చేశారు. వారు దొంగలై ఉంటారనే అనుమానంతో వెంటనే చిట్యాల పోలీసులకు సమాచారం అందించారు. గ్రామస్తుల అప్రమత్తతతో ఈ ఘటన స్థానికంగా చర్చనీయాంశంగా మారింది. పోలీసుల విచారణలో పూర్తి వివరాలు వెల్లడికానున్నాయి.