గోరుకల్లు ప్రాంతంలోకి నీరు.. ఘటనపై కలెక్టర్ రాజకుమారి పరిశీలన

నంద్యాల జిల్లా: పాణ్యం మండలం గోరుకల్లు ప్రాంతంలోకి సోమవారం తెల్లవారుజామున ఒక్కసారిగా నీరు ప్రవేశించిన ఘటనపై జిల్లా కలెక్టర్ రాజకుమారి స్పందించారు. ఆమె స్వయంగా ఘటనాస్థలికి వెళ్లి పరిస్థితిని పరిశీలించారు.

నీరు ఒక్కసారిగా గ్రామంలోకి రావడానికి గల కారణాలను అధికారులను అడిగి తెలుసుకున్నారు. ఈ సందర్భంగా అధికారుల నుంచి అందిన సమాధానాలపై కలెక్టర్ అసంతృప్తి వ్యక్తం చేసినట్లు సమాచారం.

రిజర్వాయర్ గేట్లు ఎత్తడం వల్ల నీరు ప్రవహించి ప్రాంతంలోకి చేరినట్లు ప్రాథమికంగా గుర్తించినట్లు అధికారులు తెలిపారు. నీటి ప్రవాహంతో ఆస్తి నష్టం జరిగినట్లు కలెక్టర్ దృష్టికి వచ్చింది.

ఈ ఘటనలో నష్టం వాటిల్లిన నేపథ్యంలో బాధ్యతపై సమగ్రంగా విచారణ చేపట్టాలని కలెక్టర్ అధికారులను ఆదేశించినట్లు సమాచారం. నిర్లక్ష్యం నిర్ధారణ అయితే సంబంధిత అధికారులపై క్రిమినల్ కేసుల నమోదుకు చర్యలు తీసుకోవాలని సూచించినట్లు తెలుస్తోంది.

బాధిత ప్రాంతంలో పరిస్థితిని పర్యవేక్షిస్తూ, నష్ట వివరాలను సేకరించాలని అధికారులను కలెక్టర్ ఆదేశించారు.