ఆసిఫ్నగర్ కాలువలో గుర్రపుడెక్క, నాచు, తూటి ఆకులను లభించాలి
ఆసిఫ్నగర్ కాలువలో గుర్రపుడెక్క, నాచు, తూటి ఆకులను లభించాలి : కలెక్టర్ చంద్రశేఖర్
ఆసిఫ్నగర్ కాలువపై కలెక్టర్ చంద్రశేఖర్ క్షేత్రస్థాయి పరిశీలన
NTODAY NEWS: నార్కట్పల్లి,
ఆసిఫ్నగర్ కాలువలో పేరుకుపోయిన పూడిక, గుర్రపుడెక్క, నాచు, తూటి ఆకులను తొలగించి దిగువ ఆయకట్టుకు సక్రమంగా నీరందేలా చర్యలు చేపట్టాలని జిల్లా కలెక్టర్ బి. చంద్రశేఖర్ అధికారులను ఆదేశించారు. మంగళవారం నార్కట్పల్లి మండలం అక్కినేపల్లి నుంచి చిప్పలపల్లి వరకు సుమారు 4.5 కిలోమీటర్ల మేర కాలువను మోటార్సైకిల్పై స్వయంగా పరిశీలించారు. కాలువలో పూడికతో పాటు గుర్రపుడెక్క, నాచు, తూటి ఆకులు పేరుకుపోవడంతో నీటి ప్రవాహానికి ఆటంకం ఏర్పడి దిగువ ఆయకట్టుకు నీరు సక్రమంగా చేరడం లేదని కలెక్టర్ గుర్తించారు. ఈ సందర్భంగా డీఆర్డీవో శేఖర్రెడ్డితో మాట్లాడుతూ వి.బి.జి. రాంజీ కింద అవసరమైన ప్రాంతాల్లో పూడికతీత, గుర్రపుడెక్క, నాచు తొలగింపు పనులు చేపట్టాలని సూచించారు. పనులకు సంబంధించిన అంచనాలను సిద్ధం చేయడంతో పాటు పనులు చేపట్టే గ్రామాల్లో గ్రామసభలు నిర్వహించి తీర్మానాలు చేయించాలని ఆదేశించారు. కాలువలో పూడికతీత, కలుపు మొక్కల తొలగింపు పనులకు వీలుగా మార్చి, ఏప్రిల్ నెలల్లో నీటి సరఫరాను నిలిపివేసేలా ముందస్తు ప్రణాళిక రూపొందించాలని ఇరిగేషన్ అధికారులను కలెక్టర్ ఆదేశించారు. అనంతరం నూతనంగా ఏర్పడిన చిప్పలపల్లి గ్రామపంచాయతీని కలెక్టర్ సందర్శించారు. సర్పంచ్ అంజిరెడ్డితో మాట్లాడి గ్రామపంచాయతీ భవనంతో పాటు మహిళా సంఘ భవనాన్ని ప్రస్తుతం ఎలా వినియోగిస్తున్నారనే వివరాలను అడిగి తెలుసుకున్నారు. ఈ కార్యక్రమంలో డీఆర్డీవో శేఖర్రెడ్డి, ఇరిగేషన్ డీఈ సునీత, ఏఈ శరత్చంద్ర, వర్క్ ఇన్స్పెక్టర్ సత్యనారాయణ, అక్కనపల్లి సర్పంచ్ రాజు, ఆర్ఐ సైదులు, ఉపసర్పంచ్ లక్ష్మమ్మ, చిప్పలపల్లి సర్పంచ్ అంజిరెడ్డి తదితరులు ఉన్నారు.
