ఒంగోలులో కాకుమాను రాజశేఖర్ కుటుంబాన్ని పరామర్శించిన వైఎస్ జగన్
ఒంగోలు: వైఎస్సార్ కాంగ్రెస్ పార్టీ అధ్యక్షుడు, మాజీ ముఖ్యమంత్రి వైఎస్ జగన్మోహన్రెడ్డి మంగళవారం ఒంగోలులో పర్యటించారు. ఒంగోలు క్లౌపేటలోని వైఎస్సార్సీపీ ప్రచార విభాగం రాష్ట్ర అధ్యక్షుడు, మాజీ లిడ్క్యాప్ ఛైర్మన్ దివంగత కాకుమాను రాజశేఖర్ నివాసానికి వెళ్లి ఆయన కుటుంబ సభ్యులను పరామర్శించారు.
కాకుమాను రాజశేఖర్ మృతిపై వైఎస్ జగన్ సంతాపం వ్యక్తం చేసి, కుటుంబ సభ్యులకు ప్రగాఢ సానుభూతి తెలిపారు. ఈ కష్ట సమయంలో ధైర్యంగా ఉండాలని వారిని ఓదార్చారు. పార్టీకి కాకుమాను రాజశేఖర్ అందించిన సేవలను ఈ సందర్భంగా వైఎస్ జగన్ గుర్తుచేసుకున్నారు. పార్టీ పట్ల నిబద్ధతతో, అంకితభావంతో పనిచేసిన ఆయన మృతి పార్టీకి తీరని లోటని పేర్కొన్నారు.
కాకుమాను రాజశేఖర్ కుటుంబానికి వైఎస్సార్ కాంగ్రెస్ పార్టీ అండగా ఉంటుందని వైఎస్ జగన్ భరోసా ఇచ్చారు. కుటుంబానికి అవసరమైన సహాయ సహకారాలు అందిస్తామని తెలిపారు. అనంతరం కుటుంబ సభ్యులతో కొద్దిసేపు మాట్లాడి వారికి ధైర్యం చెప్పిన వైఎస్ జగన్ అక్కడి నుంచి తిరుగు ప్రయాణమయ్యారు.
