ఆర్మూర్ మున్సిపల్ సమావేశంలో 28 అంశాలకు ఏకగ్రీవ ఆమోదం

నూతన మున్సిపల్ భవన నిర్మాణానికి తీర్మానం.. పార్టీలకు అతీతంగా ప్రతి వార్డుకు నిధులు: చైర్మన్ గొనె లహరి రఘు

ఆర్మూర్ (ఎన్ టుడే న్యూస్): ఆర్మూర్ పట్టణంలోని వివిధ సమస్యలపై చర్చించి, మొత్తం 28 అంశాలకు ఏకగ్రీవంగా ఆమోదం తెలిపినట్లు మున్సిపల్ చైర్మన్ గొనె లహరి రఘు, కమిషనర్ శ్రీహరి బాబు వెల్లడించారు. ఆర్మూర్ పట్టణ మున్సిపల్ కార్యాలయంలో సాధారణ కౌన్సిల్ సమావేశం నిర్వహించారు.

ఈ సమావేశంలో పట్టణ అభివృద్ధి, వివిధ వార్డుల్లో నెలకొన్న సమస్యలు, చేపట్టాల్సిన పనులు తదితర అంశాలపై చర్చించారు. సమావేశంలో మొత్తం 28 అంశాలను సభ్యులు ఏకగ్రీవంగా ఆమోదించినట్లు చైర్మన్, కమిషనర్ తెలిపారు.

ఈ సందర్భంగా కాంగ్రెస్ కౌన్సిలర్లు భూపేందర్, నర్మే నవీన్ మాట్లాడుతూ.. ఆర్మూర్ పట్టణంలోనే నూతన మున్సిపల్ కార్యాలయ భవనాన్ని నిర్మించాలని ప్రతిపాదించారు. ఈ మేరకు సమావేశంలో తీర్మానం చేసినట్లు తెలిపారు.

మున్సిపాలిటీలో అవకతవకలు జరుగుతున్నాయని బీఆర్ఎస్, బీజేపీ నాయకులు ఆరోపించడం సరికాదని కాంగ్రెస్ కౌన్సిలర్లు వ్యాఖ్యానించారు. పార్టీలకు అతీతంగా ప్రతి వార్డుకు అభివృద్ధి పనుల కోసం నిధులు కేటాయిస్తున్నామని తెలిపారు. పట్టణ అభివృద్ధి విషయంలో అన్ని వార్డులకు సమాన ప్రాధాన్యత ఇస్తున్నామని పేర్కొన్నారు.