ఘనంగా 59వ జాతీయ గ్రంథాలయ వారోత్సవాలు, బాలల దినోత్సవం

కనిగిరి గ్రంథాలయంలో నెహ్రూ జయంతి వేడుకలు.. చిన్నారులకు మిఠాయిల పంపిణీ

కనిగిరి: 59వ జాతీయ గ్రంథాలయ వారోత్సవాలు, బాలల దినోత్సవాన్ని పురస్కరించుకుని కనిగిరి గ్రంథాలయంలో గురువారం వేడుకలను ఘనంగా నిర్వహించారు. గ్రంథపాలకుడు షేక్ అహ్మద్ షరీఫ్ అధ్యక్షతన జరిగిన ఈ కార్యక్రమానికి రిటైర్డ్ మండల విద్యాశాఖ అధికారి తులసీ రామయ్య ముఖ్య అతిథిగా హాజరయ్యారు. ఆయన జ్యోతి ప్రజ్వలన చేసి కార్యక్రమాన్ని ప్రారంభించారు.

భారత తొలి ప్రధానమంత్రి పండిట్ జవహర్‌లాల్ నెహ్రూ జయంతిని పురస్కరించుకుని ఆయన చిత్రపటానికి పూలమాలలు వేసి ఘనంగా నివాళులర్పించారు. అనంతరం తులసీ రామయ్య మాట్లాడుతూ.. దేశ తొలి ప్రధానిగా జవహర్‌లాల్ నెహ్రూ భారత అభివృద్ధికి అనేక సంస్కరణలు తీసుకొచ్చారని గుర్తుచేశారు. చిన్నారులతో సమయం గడపడాన్ని ఎంతో ఇష్టపడిన నెహ్రూ జన్మదినాన్ని బాలల దినోత్సవంగా నిర్వహించుకుంటున్నామని తెలిపారు. పిల్లలే దేశ భవిష్యత్తు అని, వారి విద్యాభివృద్ధికి గ్రంథాలయాలు ఎంతో ఉపయోగపడతాయని పేర్కొన్నారు. కనిగిరి గ్రంథాలయ అభివృద్ధికి తన వంతు సహకారం అందిస్తానని హామీ ఇచ్చారు.

ఈ సందర్భంగా ఉపాధ్యాయుడు బోయర్ల వెంకటేశ్వర్లు మాట్లాడుతూ.. నేటి బాలలే రేపటి భారత పౌరులని అన్నారు. బాలల హక్కులు, స్వేచ్ఛ, సమగ్ర అభివృద్ధి పట్ల నెహ్రూ చూపిన దృక్పథం నేటి తరానికి కూడా స్ఫూర్తిదాయకమని పేర్కొన్నారు. విద్యార్థులు పుస్తక పఠనాన్ని అలవర్చుకుని విజ్ఞానాన్ని పెంపొందించుకోవాలని సూచించారు.

కార్యక్రమాన్ని చక్కగా నిర్వహించిన గ్రంథపాలకుడు షేక్ అహ్మద్ షరీఫ్‌ను పలువురు అభినందించారు. ఈ కార్యక్రమంలో ఉపాధ్యాయిని షేక్ జైనాబి, రిటైర్డ్ ఉపాధ్యాయులు షఫీ, మస్తాన్, రంతుల్లా, విద్యార్థులు, గ్రంథాలయ సిబ్బంది పాల్గొన్నారు. అనంతరం విద్యార్థులకు, కార్యక్రమానికి హాజరైన వారికి మిఠాయిలు పంపిణీ చేశారు.